Këshilltari i zëvendëskryeministrit Besnik Bislimi, Klisman Kadiu, ka thënë se nuk pret se do të ketë ikje masive nga Kosova pas liberalizimit të vizave, duke shtuar se ikjet ilegale janë evidente edhe në vendet e tjera të rajonit.
Sipas tij, ikja ilegale nga Kosova është e ulët, ndërsa ka shtuar se kjo pret të ulet edhe më tej me liberalizimin e vizave.
“Nuk besoj se ka për të ndodhur ajo që propagandohet si eksod apo ikje masive. Emigrimi legal që ndodh në Kosovë ndodh edhe në shtetet e tjera të rajonit. Këtë s’po e vuan vetëm Kosova, por edhe shtetet e tjera të rajonit dhe të Evropës. S’po them që është pozitive, por është fenomen që po ndodh edhe në shtetet e BE-së, pra migrimi legal me ikje të rregullt. Nuk mendoj se migrimi legal është diçka që Kosova do ta vuajë. Është normale të ketë lëvizshmëri në 3 deri në 6 mujorin e parë”, ka thënë ai të mërkurën në “60 Minuta” të KTV-së.
Sipas Kadiut, institucionet i kanë informuar mjaftueshëm qytetarët për shfrytëzimin e liberalizimit, përfshirë edhe ato që nuk lejohen të bëhen.
“Liberalizimi ka qenë proces i zgjatur, i lodhshëm e diskriminues, është dashur për shumë kohë të kalojnë dhe shpenzojnë kohë para dyerve të ambasadave…Këtij procesi i erdhi epilogu dhe tani nga 1 janari nisi lëvizja e lirë. Normalisht edhe përgjatë fushatës informuese që kemi zhvilluar nga 5 tetori kemi vënë re një interesim të qartë të qytetarëve për t’u informuar. Personalisht mendoj se qytetarët edhe në të kaluarën kanë qenë të informuar për rregullat e lëvizjes”, ka shtuar Kadiu
Sipas këshilltarit të Bislimit, qytetarët duhet të sigurohen që t’i ketë të gjitha dokumentet e nevojshme para lëvizjes në shtetet e zonës schengen, në mënyrë që sipas tij, “t’i kenë argumentet e nevojshme që tregojnë se e meritojnë hyrjen në zonë”.
