Ka përfunduar në Bruksel takimi mes delegacioneve të Kosovës dhe Serbisë më nivele negociatorësh.
Siç raportohet nga Brukseli nga korrespondentja e televizionit publik, Gjeraqina Tuhina, nuk ka pasur ndonjë rezultat konkret, transmeton KosovaNews.
Bislimi ka deklaruar se në agjendë kanë qenë disa tema që lidhen kryesisht me dokumentet që Lajçak ka sjellë në Prishtinë e Beograd.
Lajçak sipas Bislimit ka sjellë edhe metodologjinë se si duhet të zbatohet deklarata për të pagjeturit.
Edhe për temën e Asociacionit është diskutuar në këtë takim, ku sipas raportimeve nga Brukseli “Lajçak ka sjellë një ide të re rreth implementimit të Asociacionit, por që pala e Kosovës nuk ka pasur kohë për ta shqyrtuar atë propozim”.
Mirëpo sipas Bislimit, Petkoviq insiston që të zbatohet modeli i Asociacionit sipas marrëveshjeve të vitit 2013 dhe 2015 dhe nuk dëshiron të lëvizet nga ato korniza.
Ky është takimi i parë i kryenegociatorëve pas takimit në nivel të lartë midis kryeministrit të Kosovës, Albin Kurti, dhe presidentit të Serbisë, Aleksandar Vuçiq, më 2 maj në Bruksel.
Në atë takim, liderët politikë u pajtuan për deklaratën e përbashkët për të zhdukurit nga lufta e fundit në Kosovë dhe aty u prezantua nga Ekipi Menaxhues drafti i parë i statutit për Asociacionin e komunave me shumicë serbe në Kosovë.
Lajçak takimin e së hënës e përgatiti përmes vizitave javën e kaluar në Kosovë dhe Serbi./KosovaNews/
