Këshilltari i kryeministrit Kurti, Jeton Zulfaj i ka reaguar nënkryetares së PDK-së, Vlora Çitakut, e cila gjatë ditës së sotme në postimin e saj dha disa vërejtje për marrëveshjen e djeshme të arritur në Bruksel.
Në këtë rast, Zulfaj ia ka kujtuar Çitakut gëzimin e saj që shfaqi edhe në rrjetet sociale me 2013, kur ishte nënshkruar Zajednica.
Ai tha se në vend që sot ajo (Çitaku) dhe subjekti i saj të kërkojnë falje e të ofrojnë mbështetje për të riparuar gabimin që kanë bërë, pa pikë turpi po akuzojnë qeverinë pse po pranon diçka që ata e nënshkruan.
“Vlora u pat gëzuar fort kur u pat nënshkruar Zajednica me 2013. Në vend që sot ajo dhe subjekti i saj të kërkojnë falje e të ofrojnë mbështetje për të riparuar gabimin që kanë bërë, ajo pa pikë turpi akuzon qeverinë pse po pranon diçka që ata e nënshkruan. Më kontradiktor e jo-racional se kaq nuk mund të shkosh. Por ka një garë mes PDK e LDK se kush mund të shkojë më poshtë. Uroj ta fitojnë”, ka shkruar Zulfaj.
Sipas, tij, Çitaku e subjekti saj duhet të gëzohen që mbrëmë në mbi 1000 fjalë të thëna nga Përfaqësuesi i Lartë i BE-së, Joseph Borrel, askund nuk u përmend Asociacioni.
“Të gëzohen që asociacioni siç e menduan, negociuan, nënshkruan e për fatin e keq të Kosovës e ratifikuan në Parlamentin e Republikës tonë me 2/3tat, ku më 2015 e avancuan në Republika Srpska, nuk do bëhet. Qytetarët e Kosovës nuk i kishin borxh asgjë “vlorave” që nënshkruan Zajednicën dhe forcuan kriminelë si Radoiçiq e Veselinoviq. Andaj sot, kurseni qytetarët. Ata ju njohin mirë”, ka shkruar mes tjerash këshilltari i kryeministrit.
