Avionët luftarakë izraelitë kanë goditur pjesë të Rripit të Gazës gjatë natës së të shtunës në bombardime të vazhdueshme, duke përfshirë disa nga pjesët ku palestinezëve u ishte thënë të evakuoheshin në jug të territorit.
Sulmet e fundit erdhën një ditë pasi Shtetet e Bashkuara vendosën veton ndaj një rezolute të Kombeve të Bashkuara që kërkonte një armëpushim të menjëhershëm humanitar në Gaza.
“Sulmet nga ajri, toka dhe deti janë intensive, të vazhdueshme dhe të përhapura”, tha Sekretari i Përgjithshëm i OKB-së, Antonio Guterres, para votimit, raportoi AP.
Kufijtë e Gazës me Izraelin dhe Egjiptin janë mbyllur, duke mos u lënë palestinezëve asnjë alternativë tjetër përveç përpjekjes për të kërkuar strehim brenda territorit. Numri i përgjithshëm i vdekjeve në Gaza që nga fillimi i luftës ka tejkaluar 17,400, shumica prej tyre gra dhe fëmijë, sipas Ministrisë së Shëndetësisë në Gazën e kontrolluar nga Hamasi.
Izraeli e konsideron Hamasin përgjegjës për viktimat civile, duke akuzuar militantët për përdorimin e civilëve si mburoja njerëzore dhe thotë se ka bërë përpjekje të konsiderueshme me urdhrat e tij të evakuimit për të larguar civilët nga rreziku.
Të shtunën, banorët e Gazës raportuan sulme ajrore dhe bombardime në pjesën veriore të Rripit si dhe në jug, duke përfshirë qytetin Rafah, i cili shtrihet pranë kufirit egjiptian dhe ku ushtria izraelite kishte urdhëruar evakuimin e civilëve.
