Një rrugë që po ndërtohet nga ushtria izraelite, duke e ndarë Gazën në dy pjesë, ka arritur në Mesdhe, ka raportuar CNN sipas një analize të veten. Ky është një plan sigurie për të kontrolluar territorin për muaj dhe ndoshta vitet në vijim, kanë thënë zyrtarët izraelitë.
Një imazh satelitor i 6 marsit ka zbuluar se rruga lindje-perëndim, e cila ka qenë në ndërtim për javë, e ndan Gazën veriore nga ajo jugore. Rreth 2 kilometra përfshijnë një rrugë ekzistuese, ndërsa të tjerat janë të reja, sipas analizës.
Forcat e Mbrojtjes së Izraelit (IDF) kanë thënë se rruga mundëson kalimin e forcave dhe pajisjeve logjistike. IDF ka thënë se rruga ka ekzistuar para luftës dhe se po “rinovohej” pasi tanket “e kanë dëmtuar”.
Kryeministri izraelit, Benjamin Netanyahu, pati zbuluar një plan më 23 shkurt për një të ardhme të Gazës pa Hamasin. Aty përfshihej çmilitarizimi total i zonës.
Ministri për Diasporë i Izraelit, Amichai Chikli, i ka thënë CNN-it se rruga e re “do ta bëjë më të lehtë” për ushtrinë izraelite që të nisë bastisje në veri të Gazës dhe jug, deri në zonat qendrore të Rripit të Gazës.
Rruga, e cila ai ka thënë se do të përdoret për të paktën një vit, do të ketë tri korsi: një për tanket, një për automjetet më të lehta dhe e treta për lëvizje të shpejtë.
