Zyrtarët izraelitë janë në negociata sekrete me shtetin afrikan të Kongos dhe disa të tjerë për të pranuar palestinezët nga Rripi i Gazës, të cilët do të deportoheshin nga Izraeli. Izraeli e quan planin “vullnetar” dhe “zhvendosje humanitare”.
“Kongoja do të jetë e gatshme të pranojë emigrantë dhe ne jemi në bisedime me të tjerët”, ka thënë një burim i lartë në kabinetin e sigurisë të Izraelit, sipas The Times of Israel.
Sipas mediave, ministrja e Inteligjencës izraelite, Gila Gamliel, ka thënë dje në Knesset [ekuivalenti i Parlamentit në Izrael] se në fund të luftës, qeveria e Hamasit do të rrëzohet.
“Nuk ka autoritete komunale, popullsia civile do të jetë plotësisht e varur nga ndihma humanitare. Nuk do të ketë vende pune dhe 60 për qind e tokës bujqësore të Gazës do të bëhet një zonë tampon sigurie”, ka thënë ajo.
Dje, SHBA-ja dënoi ministrat e ekstremit të djathtë Bezalel Smotrich dhe Itamar Ben Gvir pasi mbrojtën retorikën e zhvendosjes së palestinezëve jashtë Gazës.
“Kjo retorikë është nxitëse dhe e papërgjegjshme”, ka thënë zëdhënësi i Departamentit të Shtetit, Matthew Miller.
