Ish-Presidenti kroat, Stipe Mesiq e ka cilësuar atentat sulmin ndaj kryetarit të Partisë Demokratike, Sali Berisha dy ditë më parë në protestën e opozitës.
Pas një takimi me Berishën në selinë e PD-së në Tiranë, Mesiq tha për News 24 se u befasua dhe u shqetësua shumë nga ky sulm ndërsa kryedemokratin e cilëson “babai i demokracisë në Shqipëri dhe më gjerë”.
“Isha mysafir në Shqipëri, gjatë ditëve që isha këtu dëgjova për sulmin që u bë këtu dhe më shqetësoi shumë. U befasova për shkak se Berisha është babai i demokracisë në Shqipëri dhe më gjerë. Nuk kam shumë të dhëna për momentin dhe s’dua të deklarohem për momentin, por ky është atentat ndaj Berishës”, tha Mesiq.
“Ai i duhet gjithë shqiptarëve të Shqipërisë e më gjerë, i duhet rajonit e komunitetit Evropian. I dëshiroj nga zemra shumë shëndet dhe të ngelet në politikë edhe më tutje, të punojë për demokracinë”, theksoi ish-Presidenti.
