Ish-asamblisti i Lëvizjes Vetëvendosje nga Prizreni, Islam Thaçi, ka reaguar ashpër pas vendimit të Komisionit Qendror të Zgjedhjeve (KQZ) për dërgimin në rinumërim të 2 mijë e 557 vendvotimeve, duke e cilësuar këtë situatë si pasojë të mangësive serioze të ligjit aktual të zgjedhjeve.
Në një postim publik, Thaçi ka deklaruar se vendimi i KQZ-së dëshmon se manipulimi me votat e kandidatëve është bërë në shkallë të ndryshme, “diku me 10 për qind e diku deri në 100 për qind”. Sipas tij, kjo tregon se format e vjetra të manipulimit janë tejkaluar, por janë zëvendësuar me metoda të reja përmes boshllëqeve ligjore.
Thaçi ka theksuar se rritja e numrit të votave preferenciale nga pesë në dhjetë ka krijuar hapësirë për tregti të votës brenda të njëjtit subjekt politik, ndërsa Qendrat Komunale të Numërimit, që sipas tij janë menduar si mekanizëm parandalues, “po dalin të jenë qendra të tregtisë së votës”.
Ai ka kritikuar edhe mungesën e skanimit digjital të fletëvotimeve, duke thënë se kjo pamundëson transparencën dhe qasjen e qytetarëve në procesin e numërimit. Sipas Thaçit, në tavolinat e numërimit po ndodhin marrëveshje të heshtura mes komisionerëve të subjekteve të ndryshme politike, ku, siç u shpreh ai, secili ndërhyn në favor të kandidatëve të caktuar, “me parimin ‘unë të miat, ti të tuat’”.
Në reagimin e tij, ish-asamblisti i LVV-së ka rikujtuar se komisionerët trajnohen dhe paguhen nga KQZ-ja, por sipas tij, disa prej tyre kanë parë mundësi përfitimi shtesë përmes marrjes së parave nga kandidatët.
Në fund, Thaçi u ka bërë thirrje organeve të drejtësisë që të veprojnë, duke e cilësuar vjedhjen e vullnetit të qytetarit si një shkelje të rëndë të demokracisë. “Sot ma ke vjedhur votën, nesër ma vjedh lirinë”, ka përfunduar ai reagimin e tij.
Postimi i plotë:
Sot ma ke vjedhur votën , nesër ma vjedh lirinë!
Ligji i zgjedhjeve aktual po tregon mangësitë e veta me vendimin e sotshëm të KQZ-ës qe ti qoj ne rinumërim 2557 vend votime.
Diku me 10% e diku 100%!
Arsyeja: manipulim me votat e kandidatëve.
Që i bie se partitë politike fazën e “trenit Bullgar e kanë tejkaluar me ndryshimin e Ligjit për Zgjedhjet!
Mirë po ligji aktual në këto zgjedhje shfaqi mangësitë evidente :
1. me vetë faktin që shtimi i mundësisë së votimit nga 5 ne 10 ka mundësuar tregtinë e votës mes kandidatëve të njëjtit subjekt !
2. Pavarësisht krijimit të Qendrave Komunale te Numrimit -si masë e cila do të parandalojë manipulimin! Po del qe Qendra Komunale e Numrimit është Qendra e Tregtisë së Votës !
3. E meta e QKN-ës është se nuk ka skanim të votës ne formë që të gjitha fletët votimet do të ishin të disponueshëm ne formë digjitale për çdo qytetar !
4. Po del që me një tavolinë të numërimit po ndodh “metroja Ruse” . Ku pavarësisht qe të gjitha subjektet politike kanë komisioner. A ta po bëjnë ujdi që për çdo subjekt po ndërhyn ne vullnetin e qytetarit .Ku çdo komisioner punon(keqpërdor) për një numër të caktuar të kandidatëve të subjektit të vet por edhe për kolegët e partive tjera . Me moton “unë të mijat ti të tuata”.
5.Mos të harrojmë se çdo komisioner kryen trajnime dhe paguhet nga KQZ-ja .Po tani kanë parë mundësinë që të fitojnë shtesë me marrjen e parave nga X kandidatet!
Organet e drejtësisë duhet të veprojnë.
Send sështë Byroja e Sigurimeve çka është vjedhja e vullnetit të qytetarit!
Sot ma ke vjedhur votën , nesër ma vjedh lirinë !!!
