Liverpooli ka thyer rekordin për shpenzimet e një skuadre në një afat kalimtar duke investuar plot 481.9 milionë euro, duke kaluar kështu 464 milionët e Chelseat në sezonin 2023/24.
Ky zhvillim vjen vetëm pak vite pasi Jurgen Klopp, në vitin 2022, kishte deklaruar se “Liverpooli nuk mund të konkurrojë me Manchester Cityn në treg”, në kohën kur kampionët anglezë kishin nënshkruar me Erling Haaland.
Fjalët e tij tashmë janë bërë virale, pasi vetë Liverpooli ka kryer afatin kalimtar më të shtrenjtë në historinë e futbollit anglez.
Ja si i ka shpenzuar Liverpooli 481.9 milionë euro
Alexander Isak (Newcastle) – 144 milionë euro
Florian Wirtz (Bayer Leverkusen) – 125 milionë euro
Hugo Ekitike (Eintracht Frankfurt) – 95 milionë euro
Milos Kerkez (Bournemouth) – 46.9 milionë euro
Jeremie Frimpong (Bayer Leverkusen) – 40 milionë euro
Giovanni Leoni (Parma) – 31 milionë euro
Freddie Woodman (Preston NE) – falas
Nga këto, 364 milionë euro janë investuar vetëm për treshen e re sulmuese: Isak, Wirtz dhe Ekitike. Këta pritet të formojnë një repart sulmues që do të testojë Real Madridin e Xabi Alonsos në Ligën e Kampionëve në ndeshjen e rrethit të katartë të fazës së ligës, pasi vetëm sezonin e kaluar ata kanë kontribuar me 65 gola dhe 33 asistime: Isak (27+6), Ekitike (22+12) dhe Wirtz (16+15). Pa harruar këtu edhe 34 golat dhe 23 asistimet e Mohamed Salahut.
Isak, që vetëm në dy sezonet e fundit në Ligën Premier ka shënuar 44 gola – më shumë se çdo sulmues tjetër përveç Haalandit (49) dhe Salahut (47) – e sheh këtë si një hap gjigant në karrierën e tij: “Dua të bëj histori dhe të fitoj trofe. Ky është vendi i përsosur për ta çuar futbollin tim në një nivel tjetër”, u shpreh sulmuesi suedez.
Megjithatë, ardhja e këtyre yjeve ka hapur dilema për trajnerin Arne Slot. Eksperti Paul Merson paralajmëroi: “Nëse luan Ekitike, atëherë Gakpo mbetet jashtë. Nëse Gakpo shkon majtas, atëherë Ekitike nuk ka vend. Papritmas ke edhe Wirtz, një lojtar 100 milionësh, që ende nuk po e gjen rolin e duhur. Slot ka disa probleme para tij”.
Edhe legjenda e Reds, Steve Nicol, e sheh situatën si të ndërlikuar. “Kur Isak të hyjë në dhomën e zhveshjes dhe të thotë ‘kënaqësi që të njoh’, Ekitike do të tundë kokën dhe të gjithë të tjerët, përveç ndoshta Salahut, do të mendojnë: ‘A do të më prekë kjo mua?’”.
Nga ana tjetër, Jamie Carragher mendon se Slot ka gjetur zgjidhjen: “E shoh Salahun në të djathtë, Isakun si qendërsulmues dhe Wirtzin pas tij si numër 10. Kjo e lë të lirë vetëm pozitën e sulmuesit të majtë”.
Me një repart sulmues që ka kushtuar mbi 360 milionë euro, Liverpooli jo vetëm që ka bërë transferimin më të shtrenjtë në historinë e Ligës Premier, por ka ndërtuar gjithashtu një treshe që mund të sfidojë çdo ekip, madje edhe Real Madridin.
