Irani është afër një marrëveshjeje me Kinën për blerjen e raketave supersonike kundër anijeve, CM 302. Ndërkohë, Shtetet e Bashkuara po vendosin një forcë të madhe detare pranë bregut iranian për të parandaluar sulme të mundshme.
Raketat supersonike, me një rreze veprimi prej rreth 290 kilometrash, janë projektuar për të shmangur mbrojtjen e anijeve. Ekspertët ushtarakë thonë se vendosja e tyre do të rrisë ndjeshëm kapacitetet sulmuese të Iranit dhe do të paraqesë kërcënim për forcat detare amerikane.
Negociatat me Kinën për raketat kanë nisur të paktën dy vite më parë dhe u përshpejtuan pas luftës 12 ditore midis Izraelit dhe Iranit në qershor, shkruan A2 CNN. Zyrtarë të lartë iranianë vizituan Kinën gjatë verës së kaluar për të finalizuar bisedimet, përfshirë zëvendës-ministrin e mbrojtjes Massoud Oraei.
Shitja e mundshme forcon marrëdhëniet ushtarake midis Kinës dhe Iranit dhe vjen në një moment të tensionuar rajonal, duke vështirësuar përpjekjet amerikane për të kufizuar programin e raketave të Iranit dhe aktivitetet e tij bërthamore.
Shtetet e Bashkuara po përgatiten për mundësinë e operacioneve ushtarake të gjata ndaj Iranit, ndërsa një flotë e madhe, duke përfshirë aeroplanmbajtësen USS Abraham Lincoln dhe grupin e saj sulmues, po dërgohet në rajon.
CM 302 konsiderohet një nga sistemet më të avancuara të raketave kundër anijeve në botë dhe mund të vendoset mbi anije, aeroplanë ose automjete ushtarake. Irani po diskuton gjithashtu blerjen e sistemeve kineze kundër raketave ajrore, MANPADS, armëve anti-balistike dhe sistemeve kundër satelitëve. (A2 Televizion)
