Investimet për Komunën e Shtimes po vijojnë edhe gjatë këtyre ditëve dhe kështu po transformohen edhe më tej vendbanimet e ndryshme të kësaj komune të Kosovës.
Kësaj radhe janë përuruar investimet që janë bërë në fshatin Rashinvë, i cili tashmë ka ndryshuar dhe ka marrë pamje të bukur falë investime të bëra nga komuna dhe Ministria e Zhvillimit Rajonal e Qeverisë së Kosovës.
Kryetari i komunës së Shtimes, Qemajl Aliu i ka uruar gjithë banorët, ndërsa theksoi se s’do të ndalen edhe me investime e projekte të tjera.
“Me Ministrin e Zhvillimit Rajonal, z. Fikrim Damka e bashkëpunëtorë, në mesin e dhjetëra bashkëqytetarëve dhe asambleistëve tanë, sapo përuruam projektin në vlerë mbi 90.000 euro në fshatin Rashincë. Ky investim ndryshoi në tërësi rrugën “Ferizaj” në këtë fshat, që tash është pajisur me shteg për ecje, me hapësirë të veçantë për çiklizëm dhe me ndriçim publik.
Në temperaturat e freskëta të vjeshtës dhe nga tani e tutje, banorët e Rashincës do të jenë më të sigurt edhe për shkak të ndriçimit, edhe për shkak të zonës së përcaktuar në trafik, qofshin duke ecur si këmbësorë apo me biçikletë”, ka thënë kryetari Aliu.
