Instituti Pedagogjik i Kosovës ka përmbyllur me sukses konferencën shkencore ndërkombëtare dyditore, me temën “Arsimi gjatë gjithë jetës – qasje gjithëpërfshirëse nga fëmijëria e hershme deri te arsimi profesional”. Kjo ngjarje mblodhi mbi 300 pjesëmarrës nga Kosova, Shqipëria, Maqedonia e Veriut, Estonia dhe vende të tjera, duke u shndërruar në një platformë të rëndësishme shkëmbimi profesional dhe akademik.
Gjatë dy ditëve të konferencës, folësit kryesorë sollën perspektiva dhe përvoja të ndryshme përmes temave që ngjallën diskutim dhe reflektim nga të pranishmit, si:
Sfidat, mitet dhe të vërtetat e arsimit parauniversitar në Kosovë;
Transformimi i arsimit përmes teknologjive të avancuara;
Shkolla e së ardhmes: ndryshimi i qëndrueshëm përmes partneritetit shkollë–universitet;
Praktikat e suksesshme dhe risitë në zhvillimin profesional të drejtuesve arsimorë;
Përveç dy seancave plenare, në seancat paralele mbi 60 studiues prezantuan punime kërkimore dhe praktika në fusha të ndryshme: Teknologjia dhe inovacioni në arsim; Metodat dhe qasja mësimore; Politikat arsimore dhe vlerësimi i performancës; Zhvillimi profesional dhe menaxhimi në arsim; Arsimi gjithëpërfshirës dhe mbështetja për nxënësit, Edukimi në fëmijërinë e hershme etij.
Konferenca dëshmoi edhe një herë përkushtimin e ekspertëve, mësimdhënësve dhe studiuesve për të kontribuar në ngritjen e cilësisë së arsimit në vend. Me analizat, studimet dhe rekomandimet konkrete për përmirësimin e praktikave shkollore, kjo konferencë ishte ndër ngjarjet kryesore vjetore në fushën e arsimit në Kosovë.
Përmes konferencave të tilla dhe bashkëpunimit ndërinstitucional, Instituti Pedagogjik i Kosovës synon të nxisë shkëmbimin e ideve, përvojave dhe kërkimeve për një arsim sa më cilësor.
