Pirja e duhanit në Republikën e Kosovës ndalohet me ligj në gjitha objektet e mbyllura publike.
Por, ky vendim për vite të tëra nuk është respektuar, madje as nga zyrtarët e lartë të shtetit.
Ky ligj nisi zbatimin pasi ditë më parë ministri i Bujqësisë, Pylltarisë dhe Zhvillimit Rural, Faton Peci kërkoi nga Agjencia e Ushqimit dhe Veterinarisë (AUV) që të ndërmerren masa rigoroze kundrejt zbatimit të Ligjit për Kontrollin e Duhanit si dhe shtim të aktivitetit të inspektorëve sanitarë në teren.
E vërejtje se po pihet duhani ka dhënë ditë më parë edhe publikisht kryekuvendari Glauk Kojufca dhe sot për kontroll kanë shkuar në ambientet e Kuvendit inspektorët e AUV.
KosovaNews mëson se inspektorët u futën për kontroll në Kuvend me ftesë të ministrit Faton Peci.
Inspektorët janë parë në bufe dhe pjesë tjera, porse nuk kanë hasur sot ndonjë shkelje apo person duke konsumuar duhan.
