Kabineti i kryetari të Kuvendit të Maqedonisë së Veriut, Afrim Gashi, ka deklaruar se sigurimi i tij në incidentin e Vjosa Osmanit në Aeroportin Ndërkombëtar të Shkupit ka ndërhyrë “për ta qetësuar situatën”.
Në një reagim, kabineti i Gashit ka thënë se sigurimi është përfshirë me qëllim që të udhëzohet sigurimi i aeroportit për procedurat e sigurisë gjatë vizitës së personave të rëndësishëm.
“Personeli i sigurimit të kryeparlamentarit Gashi, të cilët janë të punësuar në Ministrinë e Punëve të Brendshme, kanë ndërhyrë për ta qetësuar situatën dhe për t’i udhëzuar kolegët e tyre për procedurat e sigurisë gjatë vizitës së personave VIP. Me këtë rast theksojmë se çdo raportim që e sugjeron të kundërtën është tendencioz. Pas kësaj u bëjmë thirrje edhe mediave që kanë raportuar për këtë ngjarje, që ta verifikojnë informacionin e tyre para se të publikojnë pretendime të tilla dhe të veprojnë me përgjegjësi profesionale dhe etike”, thuhet në reagim.
