Qeverisja e Partisë Demokratike të Kosovës në krye më Shaqir Totajn në Prizren, tashmë ka filluar t’i dëshpërojë prizrenasit që ua besuan votën në zgjedhjet lokale që u mbajtën gjatë vitit të kaluar
Njëri ndër ta është edhe ish asamblisti i Aleancës për Ardhmërinë e Kosovës (AAK) në këtë Komunë, Ilir Baldedaj.
Si njëri nga lobuesit kryesor për fitimin e PDK-së në Prizren, Baldedaj i dëshpëruar, ka thënë për KosovaNews, nuk e ka pritë këtë ndryshim.
Duke e përmendur audio-incizimin e Shaqir Totaj të publikuar ekskluzivisht në KosovaNews, Baldedaj ka theksuar se nuk e ka pritë këtë qasje ndaj prizrenasve.
“Jo vetëm që kam bërë thirrje, por kam qenë një ndër lobuesit kryesor për fitoren e Shaqir Totajt. Por duke filluar nga përgjimet e marrëveshjeve të tij politike, përgjimet e komisionit për përzgjedhjen e drejtorëve me trika dhe së fundi punësimi i djalit të tij, kanë qenë vetëm disa nga arsyet e dëshpërimit tim. Unë nuk e kam prit këtë ndryshim, nuk e kam përkrahë për këtë qasje të pa përgjegjshme karshi votuesve të tij.”
Lexo po ashtu: Ekskluzive! Audioincizimi që dëshmon pazaret e Shaqir Totajt, emëron drejtor shkolle dhe auditor në këmbim të votave në asamble
I pyetur nga KosovaNews se me cilën parti mendon t’i kthehet politikës, Baldedaj, duke mos e përjashtuar mundësinë e bashkëpunimit me LVV-në dhe LDK-në, ka deklaruar se për të nuk është me rëndësi partia por opsioni i kandidatit.
“Po natyrisht se mendoj të kthehem në politikë, por në cilën parti nuk e di. Për momentin jam a-partiak. Unë gjithmonë e shohë opsionin e kandidatit. Nuk e kam telashe me partitë politike por, opsionin. Unë nuk i kam besuar Partisë Demokratike, por i kam besuar Shqir Totajt. Sepse në qeverisjen e kësaj partie unë kam qenë në pushtet me ta si drejtor i Administratës dhe e njoh mire qeverisjen e PDK-së. Kam menduar se ndryshimi do të jetë Shaqir Totaj jo Paartia Demokratike.”, ka theksuar ai.
Ai ka thënë se, në zgjedhjet e ardhshme lokale, Lidhja Demokratike e Kosovës mund fitojë Prizrenin nëse sjellë një kandidat të ri.
“Unë kam qenë një ndër asamblistët më të zëshëm kundër qeverisjes së kaluar të Mytaher Haskukës dhe kam besuar në versionin e Shaqir Totajt se do të jetë ndryshim i mirë për qytetin. Mendoj se Lidhja Demokratike, që nuk ka qenë në pushtet që nga viti 2007, me një kandidat të ri ndoshta mund ta kthejë dinjitetin në Prizren.”, u shpreh Baldedaj.
Duke e cituar një fjalë të urtë popullore, Baldedaj në fund u ka kërkuar falje qytetarëve të Prizrenit që ua kërkoj votën për Shaqir Totajn e PDK-së
“E kam obligim moral të ju kërkoj falje qytetarëve të Prizrenit, që i kam kërkuar votë për Shaqir Totajn. Punësimi i djalit të tij në një kompani ku 70 për qind e Komunës është aksionare nga komisioni i përzgjedhës që është zgjedhur nga Shaqir Totaj dhe asambleja Komunale, nuk ka qenë ndryshimi që e kam pritur. Populli ka thënë: Nëse do ta njohësh dike, jepi pushtet dhe të tregon vet se kush është e çka mendon!,” u shpreh Baldedaj për KosovaNews.
Lexo po ashtu: Ekskluzive: Policia nis hetimet pas audioincizimit për Shaqir Totajn, rasti kalon në Prokurorinë Speciale
