Në kuadër të “Javës kundër korrupsionit 2022”, ambasadori i SHBA-së, Jeff Hovenier, deklaroi se shteti që ai përfaqëson, e ka si element thelbësor luftën kundër korrupsionit.
Në tribunën “Fol Hapur” të organizuar nga “Lëvizja Fol”, ambasadori amerikan rikujtoi se vitin e kaluar, presidenti Joe Biden, nxori studim kombëtar për luftën kundër korrupsionit.
“Korrupsioni ndikon në shoqëri, ngadalëson rritjen ekonomike dhe pengon çuarjen përpara të normave demokratike”, tha diplomati amerikan.
Ai u shpreh se korrupsioni ndihmon në financimin e krimeve.
“Mendojmë se është e rëndësishme puna me partnerët ndërkombëtarë në luftë kundër korrupsionit”, tha ai.
“Angazhimi i SHBA-së është të kërkojë llogari për aktorët e korruptuar”.
Hovenier tha se shoqëria civile luan rol të jashtëzakonshëm për ndërtim të demokracive funksionale.
“E çmojmë shumë shoqërinë civile në Kosovë për punën që bën për ta luftuar korrupsionin”, tha ai.
“Lufta kundër korrupsionit nuk është se bëhet vetëm një herë, por është proces afatgjatë, sepse të gjithë duhet bërë bashkë në këtë luftë si qeveria, shoqëria civile, gazetarët, gjykata etj”.
Ambasadori Hovenier deklaroi se një luftë e tillë, që të bëhet më efikase, duhet që secili segment i shtetit të funksionojë si duhet, si gjykata, policia, shoqëria civile etj.
Të hënën, me 5 dhjetor 2022, filloi “Java kundër korrupsionit 2022”.
Koalicioni i Organizatave të Shoqërisë Civile “Bashkë kundër Korrupsionit”, edhe këtë vit kanë organizuar “Javën kundër korrupsionit 5- 9 dhjetor 2022”.
Gjatë kësaj jave po realizohen aktivitete të ndryshme që për synim kanë sensibilizimin kundër korrupsionit.
Pjesë e këtij koalicioni të organizatave joqeveritare në kuadër të “Javës Kundër Korrupsionit 2022” janë 6 organizata: Instituti i Kosovës për Drejtësi (IKD), Grupi për Studime Juridike dhe Politike (GLPS), Lëvizja Fol, Iniciativa për Progres, Çohu dhe Colombus.
