Deputeti i LDK-së, Avdullah Hoti ka thënë se ne bazë të marrëveshjes së Brukselit të vitit 2013, drafti i parë i statutit të Asocicaionit duhej të përpilohej nga një ekip menaxhues prej katër serbëve bashkë me Ministrinë e Pushtetit Lokal, OSBE-në dhe BE-në.
Megjithatë sipas tij, kryeministri Albin Kurti detyrën e përgatitjes së këtij drafti ua ka lënë në dorë vetëm katër serbëve, pa e përfshirë MAPL-në, OSBE-në dhe BE-në.
Deputeti Hoti thotë se vetëm kryeministri Kurti e di se pse ka lejuar që propozimin për draftin ta propozojë një ekip i tillë.
Ai ka drejtuar edhe disa pyetje në adresë të kryeministrit Albin Kurti.
“1. Përse Kurti nuk e kundërshtoi këtë veprim?
2. Përse nuk kërkoi që drafti i statutit të përgatitej sipas procedurës së dakorduar qysh më 2013?
3. Përse Kurti nuk po e shpall të pavlefshme punën e atij ekipi menaxhues duke qenë së është punuar jashtë procedurave të parapara me marrëveshje?
4. Përse nuk e cakton ekipin e ri përmes Ministrit Krasniqi dhe të sigurohet se vetë Ministri Krasniqi merr pjesë në draftimin e statutit bashkë me OSBE-në dhe BE-në?
Unë nuk besoj që ai draft do të përfundonte në tavolinën e bisedimeve më 2 maj 2023 pa dakordimin e Kurtit. Për çfarë tjetër është dakorduar Kurti?!”, ka shkruar mes tjerash Hoti.
Ndërkaq Qeveria Kurti II, në fillim të këtij muaji, respektivisht më 3 maj ka shkarkuar këtë Ekip menaxhues. Vetë ministri i Administrimit të Pushtetit lokal, Elbert Krasniqi, ka njoftuar se ka liruar nga detyra Ekipin Menaxhues për hartimin e draftstatutit për Asociacionin e Komunave më shumicë serbe në Kosovë.
“Andaj, sot me datë 03 maj 2023, kam marr vendim për lirimin nga detyra të anëtarëve të këtij ekipi menaxhues, në përbërje të Danijela Vujiqiq, Jelena Boloviq, Igor Kalamar dhe Dejan Radojkoviq”, pati njoftuar Krasniqi.
Ekipi ishte i kryesuar nga Danijela Vujiçiq, e cila është aktualisht deputete e Kuvendit të Serbisë.
Kujtojmë se vendimi i parë për themelimin e këtij Ekipi ishte marrë në qershor të vitit 2013, gjatë Qeverisë së Hashim Thaçit. Vendimi i dytë ishte marrë në qershorin e 2016-s, gjatë qeverisjes nga Isa Mustafa, kurse i treti në shtator të 2020-s, gjatë Qeverisë së Avdullah Hotit.
Për shkarkimin ditë më parë foli edhe kryeministri Albin Kurti, i cili ka deklaruar se ekipi menaxhues për hartimin e draft-statutit të Asociacionit të komunave me shumicë serbe e ka përfunduar misionin dhe funksionin e tij.
“Ekipi menaxhues e ka përfunduar edhe misionin edhe funksionon e vet, andaj ne nuk kemi më arsye ta dëgjojmë ekipin menaxhues që çka pati për të thënë e tha në Bruksel më 2 maj. Edhe lirimi nga detyra është gjëja më e natyrshme dhe më e logjikshme”, ka thënë ai.
