Deputeti nga radhët e LDK-së, Avdullah Hoti, e ka kritikuar edhe sot Qeverinë se nuk ka marr masa për të ndihmuar qytetarët për t’u përballur me rritjen e çmimeve.
Sipas Hotit, që një kohë ishte edhe kryeministër i vendit deri sa Kushtetuesja konstatoi si mori postin jashtëligjshëm), Qeveria është kujdesur vetëm për një pjesë të bizneseve.
“Por, pushtetarët u kujdesën për një pjesë të bizneseve – ato biznese që kanë kontrata me shtetin për investime kapitale. Kuvendi e miratoi ligjin diskriminues për punët publike, me të cilin bizneset mund të rrisin çmimin e kontratave me shtetin deri në 20% për shkak të rritjes së çmimeve të materialeve”, ka shkruar Hoti në Facebook.
Sipas tij në Kosovë masat substanciale për tu përballur me inflacionin nuk shihen askund, me përjashtim, siç ka thënë ai, të shtesave në pensione dhe asistencë që janë të përkohshme. “Tatimi në Vlerën e Shtuar (TVSH) dhe akciza nuk u ulën, jo se nuk ishte e përballueshme për buxhetin, por për shkak se ishte propozuar opozita (nga LDK-ja). Si rezultat i inflacionit, shteti inkasoi shumë më tepër të hyra, të cilat nuk i shpenzoi dhe, si rezultat, ato u zhvlerësuan së paku për 12%”, ka shkruar Hoti.
Sipas tij sikur të uleshin ngarkesat tatimore dhe akciza në naftë, atëherë efektet do t’i ndienin të gjithë pa përjashtim. “Nuk do të kishte pasur nevojë për këtë ligj diskriminues. Nuk do të ishin mbledhur mjete pa nevojë në buxhet, të cilat po zhvlerësohen”, ka shkruar Hoti.
Sipas tij vendet e tjera për të ulur barrën për qytetarë, rritën pagat për normën e inflacionit, i ulën ngarkesat tatimore, i ndihmuan qytetarët pa përjashtim në përballimin e kostos së jetesës e në veçanti subvencionuan çmimin e gazit dhe naftës, çmimet e të cilave sipas Hotit, u rritën më së shumti dhe ndikuan në rritjen e të gjitha çmimeve të tjera.
Sipas statistikave të Agjencisë së Statistikave të Kosovës, vlera mesatare e inflacionit në Kosovë gjatë vitit 2022 ishte 12%.
“Inflacioni mesatar në dhjetor 2022 arriti në 12%, por për disa mallra dhe shërbime elementare, ku shpenzohet shumica e buxhetit familjar, arriti në: 47% për shpenzime të transportit, 39% për lëndë djegëse, 31% për vajra dhe yndyra, 28% për qumësht, djathë e vezë, 21% për bukë e drithëra, 20% për mish, 18% për sheqer etj”, ka shkruar Hoti.
