Ish-ushtruesi i detyrës së Sekretarit të Përgjithshëm të Federatës së Futbollit të Kosovës (FFK) dhe ish-avokati i saj, Taulant Hodaj, ka reaguar ashpër ndaj zhvillimeve të fundit në Kongresin e UEFA-s, ku simbolet shtetërore të Kosovës u hoqën nga Federata e Futbollit të Serbisë, përcjellë KosovaNews.
Në një postim në rrjetin social Facebook, Hodaj ka shprehur shqetësimin e tij për mungesën e një reagimi proaktiv dhe proteste të dinjitetshme nga FFK-ja ndaj këtij veprimi.
“Duke reflektuar mbi kohën time në Federatën e Futbollit të Kosovës, e ndiej të nevojshme të ndaj disa shqetësime thelbësore rreth zhvillimeve të fundit në Kongresin e UEFA-s në Beograd. Ashtu siç u pa qartë në Beograd, simbolet dhe respekti për Kosovën u shkelën në mënyrë flagrante, ndërsa mungoi një reagim proaktiv dhe protestë e dinjitetshme nga Federata e Futbollit të Kosovës,” ka shkruar Hodaj.
Ai ka theksuar se veprimi i Serbisë është i dënueshëm, duke përmendur edhe ekzistencën e një federate paralele për “Kosovën dhe Metohinë” brenda statutit të Federatës së Futbollit të Serbisë, me figura si Radoiçiqi, që kanë drejtuar gara paralele në Kosovë.
Hodaj ka zbuluar se kërkesa e tij e mëparshme për t’iu ankuar UEFA-s ndaj Serbisë për këtë shkelje flagrante të parimeve të futbollit dhe rregullave të UEFA-s është injoruar nga FFK-ja pa asnjë arsye legjitime.
Reagimi i tij vjen në një kohë kur tensionet midis Kosovës dhe Serbisë vazhdojnë të jenë të larta, duke ndikuar edhe në fushën e sportit.
