Ushtruesja e detyrës së presidentes së Republikës së Kosovës, Albulena Haxhiu, dhe kryeministri në detyrë, Albin Kurti, kanë bërë homazhe te varri i heroit Ilir Konushevci dhe Dr. Hazir Malaj, në 28-vjetorin e rënies së tyre, duke vlerësuar lart kontributin dhe sakrificën e tyre për lirinë e Kosovës.
Haxhiu i cilësoi Konushevcin dhe Malajn si dy figura të respektuara dhe heronj të Republikës së Kosovës dhe të kombit shqiptar, duke theksuar kontributin e tyre në rrugën për liri dhe pavarësi.
Ajo kujtoi se Ilir Konushevci ishte vetëm 20 vjeç kur nisi angazhimin për lirinë e vendit dhe u bë pjesë e grupeve të para të rezistencës së armatosur gjatë viteve ’90, në kohën kur Kosova përballej me dhunë policore, shtypje dhe diskriminim ndaj shqiptarëve.
Sipas Haxhiut, Konushevci ishte pjesë e grupit “Shqiponja”, së bashku me figura të njohura të luftës si Zahir Pajaziti, Hakif Zejnullahu dhe Edmond Hoxha.
Ajo theksoi se Ilir Konushevci kishte marrë një nga detyrat më të vështira të kohës, furnizimin e Ushtria Çlirimtare e Kosovës me armë dhe municion, duke bërë vazhdimisht rrugën Kosovë-Shqipëri.
“Me çdo dërgesë mund të fitohej një betejë dhe me çdo vonesë të një dërgese mund të rrezikohej populli ynë”, tha Haxhiu.
Sipas saj, Konushevci dhe Malaj u vranë pikërisht në kohën kur po planifikonin një tjetër dërgesë për UÇK-në, ndërsa rënia e tyre përbënte goditje të rëndë për luftën çlirimtare.
“Lavdi jetës dhe veprës së Ilir Konushevcit dhe Hazir Malajt”, u shpreh Haxhiu.
Ndërsa, kryeministri në detyrë Albin Kurti e vlerësoi lart figurën dhe kontributin e Konushevcit dhe Malajt në luftën për çlirimin e Kosovës, duke theksuar se ata ishin të pandashëm në idealin për liri dhe bashkim kombëtar.
“Njëri nga Kosova, tjetri nga Shqipëria, të pandashëm për çlirim e për bashkim. Ilir Konushevci dhe doktor Hazir Malaj nuk u ndanë asnjëherë nga njëri-tjetri. E kishin idealin e njëjtë dhe ishin të angazhuar deri në flijim për çlirimin e Kosovës dhe për Republikën e pavarur e sovrane që e gëzojmë sot”, deklaroi Kurti.
Ai e cilësoi Ilir Konushevcin si “shpirtin e logjistikës” dhe të furnizimit të luftës çlirimtare, duke theksuar se kontributi i tij kishte nisur shumë kohë para luftës.
Sipas Kurtit, forcimi i sotëm i Forca e Sigurisë së Kosovës është një mënyrë për të shlyer një pjesë të borxhit ndaj dëshmorëve dhe martirëve të luftës.
Kurti kujtoi edhe barrën e madhe që kishte marrë Konushevci pas vrasjes së Zahir Pajaziti, duke theksuar se sakrifica dhe përkushtimi i tij duhet të shërbejnë si mësim për brezat e rinj.
“Sakrifica e tij dhe lufta e paepur që bëri duhet të mësohet nga brezat e rinj, se si duhet atdheu dhe si duhet të bëhemi shembull për ata që vijnë pas nesh”, tha Kurti.
