Kryetarja e Kuvendit të Kosovës, Albulena Haxhiu, ka bërë të ditur se deri tani është propozuar vetëm një kandidat për president, Glauk Konjufca, i cili ka marrë nënshkrimet e 30 deputetëve të Lëvizjes Vetëvendosje dhe të grupit multietnik.
Haxhiu ka bërë thirrje që deputetët të dorëzojnë nënshkrimet për një kandidat tjetër, në mënyrë që të plotësohet kushti për thirrjen e seancës për zgjedhjen e presidentit.
Ajo ka theksuar se afati i fundit kushtetues për thirrjen e seancës është 5 marsi 2026, duke nënvizuar urgjencën e situatës.
“Mund të ketë kërkesa për seancë të jashtëzakonshme, por seancë për zgjedhje të presidentit s’mund të ketë pa së paku dy kandidatë. Zgjedhja e presidentit duhet të bëhet jo më vonë se 30 ditë para përfundimit të mandatit të presidentit aktual. Afati kushtetues është 5 marsi i vitit 2026, pra kemi më pak se 30 ditë deri në përfundim të këtij afati që e bën situatën më urgjente. Ftoj të gjithë deputetët që ende nuk kanë dhënë nënshkrimet të reflektojnë dhe të shqyrtojnë mundësinë për propozimin e së paku një kandidati tjetër,” tha Haxhiu gjatë konferencës për media.
Ajo shtoi se në këtë fazë kërkohet maturi dhe përgjegjësi nga të gjitha palët dhe se interesi i Republikës së Kosovës dhe i qytetarëve duhet të vendoset mbi çdo kalkulim politik.
