Kryetari i Aleancës për Ardhmërinë e Kosovës (AAK), Ramush Haradinaj, zhvilloi një takim me përfaqësuesit e shoqatave të dala nga lufta, ku diskutuan për situatën alarmante të pjesëtarëve të kategorive të lirisë.
Haradinaj e bëri të ditur këtë takim përmes një postimi në llogarinë e tij në Facebook.
Ai shprehu shqetësim të thellë për gjendjen e rënduar të veteranëve dhe invalidëve, duke theksuar se pagat e tyre janë të pamjaftueshme dhe se shumë prej tyre nuk kanë akses në asistencën shëndetësore të nevojshme.
“Të dhënat e prezantuara në tryezën e organizuar nga Aleanca për Ardhmërinë e Kosovës flasin për një situatë alarmante. Veteranët me paga qesharake, invalidët pa asistencën e nevojshme shëndetësore, familjet e dëshmorëve në harresë totale”, tha Haradinaj.
Ai nënvizoi angazhimin e Aleancës për të rikthyer dinjitetin e luftëtarëve, veteranëve, invalidëve dhe familjeve të dëshmorëve.
“Kjo shoqëri duhet që urgjentisht ta rikthejë dinjitetin e kategorive të lirisë, pjesëtarët e të cilave janë më meritorët për lirinë që e gëzojmë sot. Ata që e harrojnë të shkuarën, rrezikojnë që ajo t’u përsëritet”, përfundoi Haradinaj.
