Kryetari i Aleancës për Ardhmërinë e Kosovës (AAK), Ramush Haradinaj, ka kujtuar sot heronjtë e kombit, Afrim Zhitia dhe Fahri Fazliu, në 36-vjetorin e rënies së tyre.
Në një postim në Facebook, Haradinaj ka vlerësuar lart veprën dhe sakrificën e tyre, duke thënë se ata u mbuluan me lavdi të përjetshme në mbrojtje të idealit për lirinë e atdheut.
“Heronjtë e kombit, Afrim Zhitia dhe Fahri Fazliu, u mbuluan me lavdi të përjetshme 36 vjet më parë, duke e mbrojtur me guxim të palëkundur idealin për lirinë e atdheut. Me veprën e tyre motivuan brezat që në fundshekullin e kaluar t’i japin fund robërisë përmes luftës sonë çlirimtare. Vepra e tyre qëndron e përjetësuar në thelbin e lirisë dhe shtetit të Kosovës. Lavdi e përjetshme!”, ka shkruar Haradinaj.
Afrim Zhitia dhe Fahri Fazliu janë ndër figurat më të njohura të rezistencës shqiptare kundër pushtimit serb dhe simbol i përkushtimit për lirinë e Kosovës.
