Në tryezën e mbajtur nga Grupi Parlamentar i AAK-së, me temë “Buxheti i Republikës së Kosovës për vitin 2024”, u tha se ka shumë institucione që nuk kanë përfituar rritje të buxhetit, që sipas tyre, është në dëm të shtetit.
Kryetari i kësaj partie, Ramush Haradinaj, ka thënë se projektbuxheti për vitin e ardhshëm nuk është zhvillimor, por stagnues. Ai shtoi se ky buxhet është i varfërimit dhe assesi i rritjes ekonomike.
Haradinaj ka theksuar se buxheti për vitin e ardhshëm nuk përbën zhvillim ekonomik, por varfëri e stagnim.
“Projektbuxheti me parametrat nuk është zhvillimor, por stagnues. Rritja minimale praktikisht është shkurtim i buxhetit, marr parasysh inflacionin që është dhe që do të vijë. Rritja e koeficientit për vitin e ardhshëm nuk është rritje dhe investimet kapitale nuk mundësojnë ndonjë zhvillim ekonomik”, ka theksuar Haradinaj.
Tutje, ai ka shtuar se rritjen e koeficientit e konsideroi të vogël krahasuar me inflacionin.
Tutje, Haradinaj ka bërë të ditur se “asnjë nga projektet infrastrukturore nuk janë realizuar këtë vit, por janë bartur për vitin e ardhshëm. Fondi i transferove sociale është zvogëluar për 12 për qind që do të thotë se nuk do të ketë rritje për familjet sociale. Ky buxhet është buxhet i varfërisë dhe i stagnimit”.
