Kryetari i Leposaviqit, Lulzim Hetemi ka bërë të ditur se sot ka nënshkruar marrëveshje bashkëpunimi me drejtorin e Agjencionit të Regjistrimit Civil, Blerim Camaj lidhur me hapjen e zyrës së re për regjistrim të automjeteve me targa RKS, edhe në komunën e Leposaviqit.
Sipas Hetemit, hapja e kësaj zyre erdhi duke marrë parasysh interesimin e madh të qyetetarëve për të regjistruar makinat me tabelat RKS.
Ai tha se me hapjen e zyrës në Leposaviq do të lehtësohet shumë kjo procedurë edhe për qytetarët e kësaj zone.
Nënshkrimi i kësaj marrëveshjeje u bë në praninë e ministrit të Adminstrimit të Pushtetit Lokal Elbert Krasniqi, ministrit të Punëve të Brendshme, Xhelal Sveçla si dhe drejtorin Agjencionit të Regjistrimit Civil Blerim Camaj.
Ditëve të fundit dhe sidomos sot është parë interesim i rritur i qytetarëve nga veriu për të regjistruar automjetet me targa RKS.
Një kolonë me automjete me targa “KM” u pa mëngjesin e 2 nëntorit para Qendrës për Regjistrim në Mitrovicë të Veriut, pasi Qeveria e Kosovës më 30 tetor vendosi për shtyrjen e afatit për riregjistrimin e automjeteve me targa ilegale serbe në ato RKS – Republika e Kosovës.
Shtyrjes së afatit i parapriu një kërkesë nga drejtoria e Policisë së Kosovës për rajonin e veriut drejtuar Ministrisë së Punëve të Brendshme të Kosovës.
Kjo kërkesë u bazua në kërkesat e qytetarëve që kërkuan që ky afat të vazhdohej.
DETAJE në linkun më poshtë:
