Deputeti i Partisë Demokratike të Kosovës (PDK), Xhavit Haliti, ka thënë se ambasadat e Kosovës nëpër vendet perëndimore janë shndërruar në ambasada biznesi me dokumente personale si dhe më shërbime që ofrojnë për azilantët që sipas tij, rrejshëm kërkojnë azil politik.
Haliti gjatë raportimit të ministres së Jashtme, Donika Gërvalla, në Komisionin për punë të jashtme, ka thënë se ka një lëvizje anti-Kosovë të kosovareve nëpër vende të perëndimit, të cilët ka thënë se po kërkojnë azil politik pa ndonjë arsye.
“Kam përshtypjen që ambasadat tona janë shndërruar në ambasada biznesi, me pasaporta dhe me letërnjoftime dhe shtyhen me njëra-tjetrën se kush po fiton më shumë nga të hyrat që kanë nga dhënia e pasaportave dhe me shërbimet që u bëjnë azilantëve që kanë kërkuar strehim politik dhe kanë bërë deklarata kundër Kosovës, kundër gjendjes së tanishme në Kosovë”, është shprehur Haliti.
Sipas tij është mirë që politikat shtetërore, por edhe politikat e Ministrisë së Punëve të Jashtme, të jenë të përcaktuara në raport me refugjatët, të cilët kanë kërkuar azil politik pas çlirimit të Kosovës. “Pse e kanë kërkuar këtë azil politik, a duhet të ju jepen atyre pasaporta nëpër ambasadat tona dhe a duhet pranuar këta njerëz të cilët kanë gënjyer për terrorin që gjitha po ju bëhet atyre në Kosovë, janë paraqitur shumë shqiptarë me emra të rrejshëm dhe me kombësi të rrejshme duke thënë se shqiptarët në Kosovë po na bëjnë presion dhe duke përdorur edhe fenë në këtë rast se gjoja në Kosovës nuk ka të drejta të fesë”, ka theksuar Haliti.
Në përgjigjen ndaj këtyre pretendimeve, Gërvalla ka thënë se ambasadat e Kosovës nuk merren me biznes, por merren me nxitje të bizneseve të huaja për të rritur numrin e investimeve në Kosovë e për t’i ndihmuar zhvillimit ekonomik të Kosovës.
Ajo ka thënë ka kërkuar që çmimet për shërbimet konsullore të rishqyrtohen.
“Sa u përket pasaportave unë kam udhëzuar sekretarin që të fillojë negociatat me institucionet e tjera relevante me qëllim që të rishqyrtojnë edhe një herë çmimet që paguhen për shërbimet konsullore. Nëse e patët fjalën për çmimet e larta për pasaporta pajtohem plotësisht me juve”, është shprehur Gervalla.
Për çështjet e azilit politik ajo ka thënë se nuk është e informuar dhe se do të merret me të dhe legjislacionin që rregullon lëshimin e dokumenteve. “E di që në vitin 2015 ka pasur një valë të madhe të qytetarëve që janë larguar nga Kosova, në forma ilegale për vende të tjera, e di që ka pasur atëherë kërkesa të shumta azili, pasaportat që lëshohen në konsullatat tona, lëshohen në bazë të Ligjit për dokumentet e identitet, nëse ligji nuk e përfshin përjashtimin e ndokujt nga dhënia e këtij dokumenti , atëherë ambasadat nuk kanë hapësirë për të ia ndaluar askujt dokumentin”, është shprehur Gervalla, duke shtuar se do të merret me këtë çështje dhe të shoh nëse në legjislacion ka një hapësirë që mundëson zhvillime që nuk shkojnë në favor të Republikës së Kosovës”, është shprehur Gërvalla.
