Partia Guxo ka reaguar pas publikimeve ku pretendohej se familja e Presidentit historik Ibrahim Rugova kishte “refuzuar vizitën e Donika Gërvallës dhe përfaqësuesve të Guxo-s”. Këto pohime janë cilësuar si të pavërteta dhe të pabazuara nga Sekretarja e Përgjithshme e partisë, Triera Kasumi Berisha.
Në reagimin zyrtar thuhet se më 2 dhjetor, përfaqësues të Guxo-s kanë kryer homazhe dhe kanë vendosur lule në varrin e Presidentit Rugova, me rastin e ditëlindjes së tij, duke nderuar kontributin dhe figurën e tij shtetformuese. Sipas partisë, nuk ka ekzistuar asnjë kërkesë, tentativë apo planifikim për të vizituar familjen Rugova.
“Pretendimet për një ‘refuzim’ janë të pavërteta. Nuk ka pasur asnjë komunikim zyrtar apo jozyrtar dhe asnjë lloj kërkese që do të mund të çonte në një situatë të tillë,” thuhet në deklaratë.
Guxo e ka cilësuar raportimin si dezinformim që synon të cenojë besimin e qytetarëve dhe të krijojë perceptime të gabuara në opinion. Në përfundim, partia ka kërkuar korrigjimin e lajmit dhe publikimin e demantit, në përputhje me standardet profesionale të informimit.
