Veriu i Kosovës është zgjuar të dielën me grafite të reja, nga “Brigada Veriore”, shkruan “Kossev”.
Pranë sheshit kryesor në veri të Mitrovicës është shkruar grafit ku thuhet se nga 21 nëntori duhet rezistuar në çdo hap.
“Nga data 21.11 është detyrë e të gjithëve të rezistojnë në çdo hap! Brigada Veri”, shkruan në grafit.
Herën e fundit që ishte vendosur një grafit nga “Brigada Veriore” ishte në fund të gushtit.
“Mos u shqetëso, këtu jemi – Brigada Veriore” dhe “NATO shko në shtëpI! Kjo është Serbi. Brigada e Veriut po rritet dita-ditës”.
Serbët në veri janë tërhequr nga institucionet e Kosovës, duke përmendur si pretekst vendimin për targa, por edhe pezullimin e Nenad Gjuriqit nga posti i drejtorit të Policisë së Kosovës për veri, për shkak të mosrespektimit të vendimit të Qeverisë së Kosovës për targat.
Nga 1 nëntori qytetarët në Kosovë që kapen me targa ilegale të lëshuara nga Serbia me akronime të qyteteve të Kosovës po marrin fletëqortime. Ndërsa nga 21 nëntori pritet të gjobiten me nga 150 euro.
