Në takimin e 297-të të Këshillit Gjyqësor të Kosovës (KGJK), nën udhëheqjen e kryesuesit, Albert Zogaj, gjyqtarja Saranda Bogaj-Sheremeti, është zgjedhur nënkryetare e Gjykatës Komerciale.
Gjatë takimit të KGJK-së, i cili po vazhdon, anëtarët e Këshillit miratuan propozimin për caktimin e nënkryetares së Gjykatës Komerciale, gjyqtaren Saranda Bogaj-Sheremeti, me mandat të njëjtë me kryetarët e gjykatave respektive.
Ajo do të ketë mandat pesëvjeçar, njëjtë sikurse mandati i kryetarit të Gjykatës Komerciale.
Kjo është biografia e publikuar në faqen zyrtare të Gjykatës Komerciale në rrjetin social “ Facebook” të nënkryetares së sapo zgjedhur:
Saranda Bogaj – Sheremeti është gjyqtare në Dhomat e Shkallës së Dytë të Gjykatës Komerciale. Gjyqtarja Bogaj-Sheremeti ka diplomuar në Fakultetin Juridik – Universiteti i Prishtinës në vitin 2004, ndërsa provimin e Jurisprudencës e përfundoi në vitin 2005. Nga viti 2004 – 2005 ajo ushtroi detyrën e praktikantes në Gjykatën Komunale në Prishtinë. Nga viti 2006 deri në vitin 2008 ushtroi detyrën e këshilltares ligjore në Qendrën e Kosovës për Rehabilitimin e Viktimave të Torturës, ndërsa nga viti 2008 deri më 2012 ka ushtruar detyrën e Avokates tek Oda e Avokatëve të Kosovës. Më 2012 është emëruar gjyqtare në Gjykatën Komunale për Kundërvajtje në Prishtinë. Me 01.01.2013 Bogaj-Sheremeti është emëruar gjyqtare në Departamentin e Përgjithshëm- Divizioni për Çështje Civile në Gjykatën Themelore në Prishtinë, ndërsa më 1 qershor 2022 është emëruar gjyqtar në Dhomat e Shkallës së Dytë të Gjykatës Komerciale të Kosovës.
