Në rastin gjyqësor ndaj Mendim Sojevës dhe Ganimete Gashi-Ahmetit, të akuzuar për përvetësimin e mbi 1 milion e 300 mijë eurove nga Agjencia e Kosovës për Produkte dhe Pajisje Medicinale (AKPPM), gjykatësja Violeta Namani-Hajra ka kundërshtuar vendimin e trupit gjykues për t’i liruar nga aktakuza.
Sojeva akuzohej për veprën penale “Përvetësimi në detyrë”, ndërsa në bashkëkryerje me Gashi-Ahmetin edhe për “Hyrje në sistemet kompjuterike”. Megjithatë, më 5 maj 2025, Gjykata Themelore në Prishtinë i kishte shpallur të pafajshëm, me shumicë votash”.
Trupi gjykues përbëhej nga Vesel Ismaili (kryetar), dhe anëtarët Kujtim Krasniqi e Violeta Namani-Hajra, kjo e fundit duke përpiluar një mendim mospajtues prej 23 faqesh, në të cilin argumenton pse të akuzuarit duhej të dënoheshin.
Çfarë përmban mendimi mospajtues
Sipas gjykatëses Namani-Hajra, dëshmitë e 36 dëshmitarëve gjatë procesit gjyqësor provojnë se të akuzuarit kanë kryer veprat penale që u vihen në barrë.
Ajo thekson se Mendim Sojeva, në cilësinë e Udhëheqësit të Divizionit për Buxhet dhe Financa në AKPPM, kishte përgjegjësi për certifikimin e pagesave gjatë viteve 2014–2018, periudhë në të cilën janë tërhequr 1,355,441 euro e 14 centë në emër të avancave për udhëtime zyrtare.
Në mendim thuhet se nuk janë respektuar procedurat ligjore për këto tërheqje dhe se një pjesë e madhe e parave – mbi 1.2 milion euro – është tërhequr pa asnjë dokumentacion që vërteton miratimin apo pranimin e tyre nga ndonjë zyrtar i AKPPM-së.
Gjykatësja thekson se fletëtërheqjet janë nënshkruar nga vetë Sojeva, ndërsa shumica e zyrtarëve emrat e të cilëve janë përdorur për avanca, kanë mohuar të kenë marrë ndonjë shumë parash.
Po ashtu, sipas saj, Sojeva ka tentuar që pas afatit ligjor të mbyllte avancat duke hyrë në sistemin financiar SIMFK me fjalëkalimet e zyrtarëve të Thesarit, veprim që sipas mendimit përbën “hyrje të paautorizuar në sistem kompjuterik.”
Pasuria e pajustifikuar
Në mendimin e saj, gjykatësja Namani-Hajra përmend edhe pasurinë e Sojevës, i cili me pagë mujore 648 euro posedonte dy vetura luksoze, Land Rover dhe Audi A3 Sportback, duke e cilësuar pasurinë e tij të pajustifikueshme dhe të fituar përmes veprës penale.
Përfundimi i mendimit mospajtues
Sipas Namani-Hajrës, provat në dispozicion janë të mjaftueshme për të provuar fajësinë e të akuzuarve dhe se ata duhej të shpalleshin fajtorë dhe të dënoheshin sipas ligjit.
Kjo çështje aktualisht ndodhet në fazën e ankimimit.
Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë./BetimipërDrejtësi/
