Gjykata Supreme të mërkurën refuzoi kërkesën urgjente të administratës Trump për të ngrirë afërsisht 2 miliardë dollarë ndihma të huaja, të cilat ishin të miratuara nga Kongresi.
Siç shkruan NY Times, urdhri i gjykatës ishte pa firmë dhe thoshte vetëm se gjykatësi i shkallës së parë, i cili kishte urdhëruar rifillimin e pagesave, “duhet të sqarojë cilat detyrime duhet të përmbushë qeveria.”
“Një gjyqtar i vetëm në gjykatën e rrethit, i cili ka gjasë të mos ketë juridiksion, ka fuqinë e pakufizuar për të detyruar qeverinë e Shteteve të Bashkuara të paguajë 2 miliardë dollarë të taksapaguesve? Përgjigja ndaj kësaj pyetjeje duhet të jetë një ‘Jo’ e theksuar, por shumica e kësaj gjykate duket se mendon ndryshe. Jam i tronditur,” tha Gjyqtari Samuel Alito Jr.
Administrata Trump kishte ndërprerë ndihmën më 20 janar, ditën e parë të presidencës së tij.
Marrësit dhe grupe të tjera jofitimprurëse ngritën dy padi që sfiduan ngrirjen si një ushtrim të pabazuar të pushtetit presidencial që pengonte alokimet e Kongresit për Agjencinë e Shteteve të Bashkuara për Ndihmën Ndërkombëtare.
Pas disa padive, gjykatësi Amir Ali urdhëroi më 13 shkurt që zyrtarët e administratës të rifillonin pagesat. Pas shpërfilljes së këtij urdhri, ai urdhëroi më 25 shkurt pagimin e 1.5 miliardë dollarëve për punë të përfunduar. Vetëm disa orë para afatit, administrata paraqiti një aplikim urgjent në Gjykatën e Lartë. Kryegjyqtari John G. Roberts Jr. lëshoi një ndalim administrativ që e bllokoi përkohësisht. Më pas, urdhri i së mërkurës hoqi ndalimin.
