Gjykata Themelore në Prishtinë ka shpallur aktgjykimin ndaj 17 të akuzuarve në rastin “Transporti”. Kjo Gjykatë, i ka dënuar me nga 7 vjet burgim dhe nga 5 mijë euro gjobë të akuzuarit Ismet Zeqiri, Agron Zymeri, Gentrit Zymeri, Canabeg Hyseni, Ali Musliukaj, Besnik Istrefi, Liridon Hyseni dhe Azem Islami për pjesëmarrje ose organizim të grupit kriminal.
Në këtë rast, Ismet Zeqiri, Canabeg Hyseni, Ali Musliukaj, Liridon Hyseni, Besnik Istrefi, Azem Islami, Xhevat Spahija, Selami Morina, Sabri Hasani, Burim Hasani, Alban Nikqi, Gentrit Zymeri, Agron Zymeri, Shkëlqim Jusaj, Nexhat Mazreku, Demë Lokaj dhe Albion Lokaj, akuzoheshin për krim të organizuar e vepra tjera penale, raporton “Betimi për Drejtësi”.
Aktgykimi u shpall të martën nga kryetari i trupit gjykues, Ngadhnjim Arrni, raporton “Betimi për Drejtësi”.
Për të akuzuarit: Xhevat Spahija, Shkëlqim Jusaj, Selami Morina, Burim Hasani, Sabri Hasani, Nexhat Mazreku, Alban Nikqi, Demë Lokaj dhe Albion Lokaj, gjykatësi Arrni tha se nuk është vërtetuar se kanë qenë pjesë e grupit kriminal të organizuar, andaj ndaj tyre u shpall aktgjykim lirues.
Ndërsa, shtoi se pas vërtetimit të gjendjes faktike nga ekspertiza, ka rezultuar se veprimet tjera eventuale të të akuzuarve të lartpërmendur tashmë janë parashkruar, me çka gjykata ka shpallur aktgjykim refuzues për veprat tjera penale për këta të akuzuar.
Kurse, për të akuzuarit, Agron Zymeri, Gentrit Zymeri, Ismet Zeqiri, Canabeg Hyseni, Azem Islami, Demë Lokaj dhe Alban Nikiqi, Gjykata ka nxjerrë aktgjykim refuzues për veprën penale të armëmbajtjes pa leje, pasi që ka arritur parashkrimi i kësaj vepre penale.
Për shpenzimet gjyqësore, të akuzuarit që u shpallën fajtorë, obligohen që secili veç e veç të paguajnë paushallin gjyqësor prej 200 euro, ndërsa për fondin për kompensimin e viktimave shumën prej 100 euro.
Ndërsa, për të akuzuarit që iu është refuzuar aktakuza, shpenzimet procedurale bien mbi barrën e Gjykatës.
Kundër këtij vendimi, pala e pakënaqur ka të drejtë ankese në afat prej 30 ditësh.
Ndryshe, ky rast më parë gjykohej në Gjykatën Themelore në Mitrovicë, mirëpo i njëjti është deleguar në Departamentin Special të Gjykatës Themelore në Prishtinë.
Në seancën e mbajtur më 7 maj 2019, me vendim të gjykatës është veçuar procedura ndaj të akuzuarit Dugagjin Latifi. Po ashtu, procedura ishte veçuar edhe ndaj Besim Zeqirit dhe Ridvan Avdiut, më 22 shkurt 2017 për shkak se gjendeshin me vendbanim jashtë Kosovës. Procedura është veçuar edhe për Fadil Qollakun.
Sipas aktakuzës së ngritur më 30 nëntor 2016, nga Prokuroria Speciale e Republikës së Kosovës (PSRK), Besim Zeqiri, Ismet Zeqiri, Agron Zymeri, Gentrit Zymeri, Canabeg Hyseni, Ali Musliukaj, Liridon Hyseni, Ridvan Avdiu, Besnik Istrefi dhe Azem Islami, ngarkohen për kryerjen e veprave penale “Pjesëmarrje ose organizim i grupit kriminal të organizuar” nga neni 283, “Kontrabandim i mallrave” nga neni 317, “Tregtia e ndaluar” nga neni 305, dhe “Shmangie nga pagesa e tarifave të detyrueshme doganore”, nga neni 318 të Kodit Penal të Republikës së Kosovës.
Po ashtu, kjo aktakuzë ngarkon edhe të pandehurit, Xhevat Spahija, Shkëlqim Jusaj, Selami Morina, Nexhat Mazreku, Demë Lokaj, Alban Nikqi, Fadil Qollaku dhe Albion Lokaj, për kryerjen e veprave penale “Pjesëmarrje ose organizim i grupit kriminal të organizuar” nga neni 283, “Kontrabandim i mallrave” nga neni 317, dhe “Shmangie nga pagesa e tarifave të detyrueshme doganore”, nga neni 318 të Kodit Penal të Republikës së Kosovës.
Gjithnjë sipas aktakuzës, për veprën penale “Mbajtje në pronësi, kontroll ose posedim të paautorizuar të armëve” nga neni 374 të KPRK-së, akuzohen secili veç e veç: Agron dhe Gentrit Zymeri, Ismet Zeqiri, Canabeg Hyseni, Azem Islami, Fadil Qollaku, Demë Lokaj dhe Alban Nikqi.
Sipas aktakuzës, të pandehurit e përmendur, në fillim të vitit 2012, kanë themeluar një grup kriminal me qëllim të përfitimit të dobisë pasurore financiare, në atë mënyrë që përmes rrugëve anësore me kamionë, cisterna dhe mjete të tjera, në mënyrë të vazhdueshme dhe të kundërligjshme nga Serbia dhe Mitrovica e Veriut, kanë sjellë në mënyrë ilegale dhe në vazhdimësi mallrat e kontrabanduara si: derivate të naftës, vajra motorike, e të tjera.
Bazuar në aktakuzë, të pandehurit Besim dhe Ismet Zeqiri, në bashkëpunim me të gjithë pjesëtarët e grupit, nga data 11 qershor 2014 e deri më 10 dhjetor 2014, nga Serbia për në Kosovë, kanë bërë kontrabandimin e 52 ngarkesave me derivate të naftës (nga 12.000 litra), 2 ngarkesa me vaj hidrol (nga 10.000 litra) dhe 3 ngarkesa me nitrotretës (nga 7.000 litra)
.
Mallrat e kontrabanduara thuhet se ky grup kriminal më pas i ka shpërndarë nëpër qytete të ndryshme të Kosovës, në dyqane dhe depo të ndryshme, e gjitha kjo me qëllim që vetes dhe personit tjetër t’i mundësojë shmangien nga pagesa e tarifave tatimore, doganore apo tarifave të tjera ose detyrimeve doganore që paguhen me rastin e importimit apo eksportimit të mallrave, duke bërë shmangien nga pagesa e tarifave të detyrueshme doganore që tejkalon shumën prej 30 mijë euro, me ç’rast me këtë ngarkohen se kanë kryer veprat penale të cekura më lartë
