Izet Godeni ishte autor i vrasjes së bashkëshortës së tij, në orët e hershme të mëngjesit të djeshëm në Prishtinë.
Gjykata Themelore e Prishtinës ka njoftuar se ndaj të njëjtit tashmë është caktuar masa 1 mujore e paraburgimit.
Sipas njoftimit të Gjykatës, Godeni, me dashje dhe në mënyrë mizore, ka privuar nga jeta bashkëshortën e tij.
Ky është njoftimi i plotë i Gjykatës:
Gjykata Themelore në Prishtinë – Departamenti për Krime të Rënda ka vendosur lidhur me kërkesën e Prokurorisë Themelore në Prishtinë për caktimin e masës së paraburgimit kundër të pandehurit I.G, për shkak të dyshimit të bazuar se ka kryer veprën penale Vrasja e rëndë nga neni 173 paragrafi 1 pika 1.3 dhe 1.4 të Kodit Penal të Republikës së Kosovës.
Gjyqtari i procedurës paraprake kërkesën e Prokurorisë për caktimin e masës së paraburgimit kundër të pandehurit I.G e ka aprovuar si të bazuar dhe të njëjtit i është caktuar masa e paraburgimit në kohëzgjatje prej 1 (një) muaji.
Me rastin e caktimit të paraburgimit, Gjykata ka marrë parasysh peshën e rëndë të veprës penale, mënyra dhe rrethanat në të cilat është kryer vepra penale si dhe pasojës së rëndë të shkaktuar me këtë vepër penale marr parasysh se me dashje dhe në mënyrë mizore I.G e ka privuar nga jeta bashkëshorten e tij, tani të ndjerën S.G.
Kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë.
