A mund të zgjidhet Donald Trump për shkak të veprimeve të tij gjatë sulmit në Kapitol? Nëntë gjyqtarë të Gjykatës së Lartë të SHBA do të përpiqen t’i përgjigjen kësaj pyetjeje shpërthyese sot, më pak se nëntë muaj para zgjedhjeve presidenciale në SHBA.
Ish-presidenti, kandidati kryesor në zgjedhjet paraprake republikane, po kërkon të rrëzojë një vendim të dhjetorit nga një gjykatë në Kolorado, që kërkon që emri i tij të hiqet nga fletëvotimet e shtetit perëndimor.
Nga njëzet shtetet ku u dorëzuan ankesat për papranueshmërinë e Donald Trump, vetëm dy ishin të suksesshme, në Kolorado dhe Maine. Megjithatë, disa shtete ende presin që Gjykata e Lartë të marrë një vendim përfundimtar.
Avokatët e Donald Trump po e quajnë vendimin e Kolorados një “anomali”, dhe po i kërkojnë Gjykatës së Lartë ta rrëzojë atë për të “mbrojtur të drejtat e dhjetëra miliona amerikanëve që duan të votojnë Trumpin për president”.
Ata ia kushtojnë shumicën e argumenteve të tyre përfundimtare një çështjeje në dukje dytësore. Po përpiqen të tregojnë se situata e 6 janarit 2021 nuk bie nën ato që mbulon amendamenti i 14-të i Kushtetutës.
Ai amendament, i miratuar në 1868 pas Luftës Civile, ndaloi nga postet e larta publike këdo që ishte përfshirë në akte “rebelimi” pasi kishte bërë betimin për të mbrojtur Kushtetutën. Një gjykatë në Kolorado vendosi se veprimet e Donald Trump më 6 janar 2021 binin nën atë amendament të 14-të.
Atë ditë, qindra mbështetës të presidentit në largim, veçanërisht të ndezur nga akuzat ndaj tij për mashtrime zgjedhore, sulmuan Kapitolin në përpjekje për të parandaluar konfirmimin e fitores së kundërshtarit të tij demokrat, Joe Biden.
Avokatët e Donald Trump pretendojnë se 6 janari nuk përfaqësonte një rebelim dhe se klienti i tyre nuk ishte i përfshirë në ato ngjarje.
Natyra e paprecedentë e çështjes ndërlikon çdo parashikim, por shumë ekspertë besojnë se nëntë gjyqtarët do të përpiqen të gjejnë një zbrazëti për të mbajtur emrin e Donald Trump në fletëvotim pa kualifikuar veprimet e tij gjatë sulmit në Kapitol.
Nëse Gjykata e Lartë nuk vendos kundër Trump, ka shumë të ngjarë që ai të jetë kundërshtari i presidentit aktual demokrat Joe Biden në zgjedhjet e nëntorit.
Ka presion për të marrë një vendim përpara 5 marsit, kur votuesit në 15 shtete, përfshirë Koloradon, hedhin votat e tyre në zgjedhjet paraprake republikane.
