Një bastisje e Policisë së Kosovës në Leposaviq pasditen e djeshme, rezultoi me gjetjen e rreth 20 uniformave të Policisë së Serbisë dhe dy këmishave të Policisë së Kosovës. Pas aksionit të policisë, ministri i Brendshëm, Xhelal Sveçla ka theksuar se kjo është dëshmi se Serbia mbetet përgjegjëse për tentativë të destabilizimit të situatës në veri. Ndërsa, për rastin nuk ka të arrestuar.
Rreth 20 uniforma të Policisë së Serbisë dhe dy këmisha të Policisë së Kosovës janë gjetur të premten pasdite gjatë një bastisje në fshatin Isev të poshtëm të Leposaviqit. Lajmin e konfirmoi zëvendësdrejtori i policisë në veri, Veton Elshani, i cili tha se shtëpia ku u gjetën të njëjtat ishte e pabanuar.
Ndërkaq, ministri i Punëve të Brendshme, Xhelal Sveçla, ka thënë se kjo është një dëshmi se mekanizmat e sigurisë të Serbisë kanë qenë dhe janë përgjegjëse të tentativës për destabilizim.
“Është detyrë dhe obligim yni shërbimi ndaj të gjithë qytetarëve pa asnjë dallim, ndërkohë që është përkushtimi dhe vendosmëria jonë që me të gjitha mjetet ligjore të mbrojmë sovranitetin dhe integritetin territorial të vendit tonë. Të gjitha elementet terroriste që tentojnë destabilizim do të shkatërrohen pa kursim e përgjithmonë”, ka theksuar ai.
Njohës të sigurisë thonë se Serbia do të vazhdojë edhe më tej të synojë destabilizimin e situatës në veri, përkundër që sipas tyre, organet e policisë do të t’i zbardhin këto raste.
Në lidhje me rastin nuk ka të arrestuar.
