Njëra nga drejtueset e partisë GUXO, Donika Gërvalla, njëherësh dhe ministrja e Jashtme në detyrë ka reaguar pas përfundimit të procesit zgjedhor për zgjedhjet lokale 2025, duke falënderuar qytetarët, aktivistët dhe mbështetësit e subjektit për angazhimin dhe besimin e dhënë, transmeton KosovaNews.
Gërvalla theksoi se për herë të parë, GUXO garoi si subjekt i pavarur në nëntë komuna të Kosovës, duke dëshmuar – siç tha ajo – se forca politike që udhëheq po konsolidohet dhe po rritet me hapa të vendosur.
“Me përmbylljen e procesit zgjedhor, Partia GUXO shpreh falënderimin dhe mirënjohjen e thellë për të gjithë ata që na mbështetën, punuan me përkushtim dhe i qëndruan vizionit tonë politik. Për herë të parë garuam si subjekt më vete në 9 komuna, duke dëshmuar qartë se forca jonë politike po rritet e konsolidohet,” ka shkruar Gërvalla.
Ajo ka përgëzuar qytetarët e Mitrovicës së Jugut për mbështetjen e dhënë ndaj kandidatit të përbashkët të koalicionit Vetëvendosje–Guxo–Alternativa, Faton Peci, të cilin e cilësoi si një fitues të fuqishëm dhe të merituar.
“Një falënderim i veçantë shkon për qytetarët e Mitrovicës së Jugut, të cilët me votën e tyre i dhanë Faton Pecit një fitore të rëndësishme. Si bashkëkryetar i GUXO-s, ai ka dëshmuar se besimi qytetar fitohet me punë konkrete dhe qëndrueshmëri,” ka shkruar ajo.
Sipas Gërvallës, rezultati i këtyre zgjedhjeve është një hap i madh përpara për GUXO-n, që po synon të ndërtojë një subjekt modern, të përgjegjshëm dhe të bazuar në vlera demokratike.
“Ne po ndërtojmë një subjekt modern, të përgjegjshëm dhe të bazuar në parime të qarta: reformë, drejtësi, barazi dhe qytetarin në qendër. Besimin e marrë do ta përkthejmë në vendime të guximshme, në mbrojtje të interesit publik, në politikë të ndershme që nuk i nënshtrohet shantazhit apo pazareve,” ka shtuar Gërvalla.
Në fund, ajo theksoi se partia GUXO do të vazhdojë rrugëtimin e saj me më shumë organizim, vendosmëri dhe energji për të ndërtuar një skenë politike më të hapur dhe më demokratike.
