Një infermiere në Klinikën Obstetrike Gjinekologjike të Qendrës Klinike Universitare të Kosovës ka ngatërruar familjet të cilat po prisnin foshnje të mërkurën në mbrëmje, duke e njoftuar familjen e gabuar se fëmija është shëndosh e mirë, edhe pse s’i kishte mbijetuar lindjes, ka njoftuar Shërbimi Spitalor Klinik Universitar të enjten.
SHSKUK-ja ka thënë se nuk bëhet fjalë për “ndërrim foshnjash” siç u raportua, por për dhënie të paautorizuar të informatave dhe ngatërrim të informatës.
“Në lidhje me foshnjën e vdekur, gjatë kohës së kryerjes së lindjes, pacientja që po kryente lindjen është njoftuar nga gjinekologët për komplikimet shëndetësore dhe se foshnje saj nuk do të mbijetonte. Deri të ngatërrimi i infermieres ka ardhur pasi në të njëjtën kohë ka pasur edhe një lindje tjetër dhe infermierja e Klinikës së Neonatologjisë ka dhënë informatë jo të autorizuar duke ngatërruar rastet, keqinfromuar prindërit”, thuhet në njoftim.
Sipas SHSKUK-së, nga menaxhmenti i Neonatologjisë është kërkuar deklaratë me shkrim nga i gjithë stafi kujdestar dhe rasti do të procedohet më tutje.
Në njoftim përsëritet se për dhënie të informatave janë të autorizuar vetëm mjekët, shefat e reparteve apo drejtorët e klinikave që përcjellin gjendjen shëndetësore të pacientëve, por jo infermieret dhe punonjësit e tjerë që nuk janë marrë direkt me trajtimin e rastit.
Me rastin është marrë edhe Policia e Kosovës. Sipas njoftimit në Polici, të mërkurën në mbrëmje është iniciuar një hetim në drejtim të veprës penale “Trajtim i pandërgjegjshëm mjekësor”.
“Hetimi ka ardhur si rrjedhojë e denoncimit të bërë pranë policisë nga ankuesi i cili ka ngritur dyshimet për trajtim të pandërgjegjshëm, ndaj klinikës ku është realizuar lindja. Dyshimet janë ndërlidhur me informimin e menjëhershëm pas lindjes se foshnja e tij është pa shenja jete, informacion ky i pranuar nga ana e personelit të klinikës përkatëse”, thuhet në njoftim të Policisë.
Trupi i pajetë është dërguar për obduksion. Policia ka thënë se po i heton të gjitha rrethanat që karakterizojnë ngjarjen me qëllim zbardhjen e plotë të tyre.
