Forcat ruse të sigurisë sulmuan një qendër paraburgimi në Rusinë jugore të dielën, duke vrarë të burgosurit që kishin marrë peng dy anëtarë të stafit, njoftoi agjencia shtetërore ruse e lajmeve RIA Novosti.
Pengët në qendrën e paraburgimit në Rostov-on-Don nuk ishin lënduar, sipas RIA Novosti, duke cituar Shërbimin Federal të Ndëshkimit të Rusisë.
Sipas njoftimit, pengmarrësit janë vrarë, ndërkaq disa media lokale kanë raportuar se të paktën disa nga të burgosurit po ashtu ishin vrarë.
Më herët, agjencia shtetërore e lajmeve Tass, duke cituar burime të paidentifikuara në zbatimin e ligjit, kishte thënë se gjashtë pengmarrës ishin në oborrin qendror të Qendrës së Paraburgimit nr. 1 të rajonit të Rostovit, të armatosur me një thikë, një shkop gome dhe një sëpatë zjarri. Të burgosurit përfshijnë burra të akuzuar për lidhje me grupin Shteti Islamik.
IS-i ka kryer një numër sulmesh në tokën ruse vitet e fundit, duke përfshirë së fundmi në mars, kur persona të armatosur hapën zjarr ndaj një turme në një sallë koncertesh në periferi të Moskës, duke vrarë 145 njerëz.
