Ministria e Drejtësisë, përmes Avokaturës Shtetërore së bashku me ekipin mbrojtës të Squire Patton Boggs kanë arritur fitoren e radhës për Kosovën në arbitrazhin ndërkombëtar, duke mposhtur pretendimet e ngritura kundër Kosovës, kështu ka bërë të ditur dje kryeministri Albin Kurti
Në fakt dje është fituar një arbitrazh shumë i rëndësishëm i ndërlidhur me Telekomin, përkatësisht Dardafon-Zmobile.
Nga fitorja e Kosovës në arbitrazh në rastin “Dardafon”, shtetit i janë shpëtuar 45 milionë euro kësaj radhe.
E pas kësaj ka pasur reagime të shumta dje nga qeveritarët, ndërsa sot këshilltari i kryeparlamentarit Glauk Konjufca, Avni Zogiani tha se kjo kontratë (Telekom-Dardafon) qe lidhur duke qenë e ditur, e sigurtëë, se do ta dëmtoje rënd kompaninë publike e do te favorizojë interesat klienteliste PDK-LDK-AAK-Devoll.
“Pothuajse pa asnjë investim grupi i interesit, Devolli Group, zhvati Telekomin e Kosovës, dhe bashkë me shumë kontrata tjera, e solli këtë kompani nga një ndërmarrje të suksesshme me 200 milionë euro dividende (2008), ne një kompani që nuk arrinte të paguante as pagat”, ka thënë Zogiani.
Për më tepër, siç thotë Zogiani në një arbitrazh të mëhershëm për këtë çështje, ka qenë fshehtësi publike që përfaqësimi i Telekomit nuk u bë, edhe pse një kompani ligjore e themeluar dyshimtë në France mori pagesën për përfaqësim.
“Sot është e vështirë të pritet nga një sistem drejtësie që liron vrasës, të vendosë drejtësi për situata të tilla si kjo me Telekom. Mirëpo, sa për ta shënuar, doja të ritheksoja se Prokuroria, hetuesia ka tepër shumë punë me këtë rast”, ka shkruar mes tjerash Zogiani.
