Aktorja e njohur kosovare, Adriana Matoshi, njëherësh edhe deputete nga radhët e Lëvizjes Vetëvendosje, ka ndarë me krenari dhe gëzim të pafund lajmin e mrekullueshëm se filmi “Të gjithë e thirrin Rexhon” ka fituar Çmimin e Filmit më të Mirë në Festivalin Ndërkombëtar të Filmit (BIF) në Bari, Itali, në kategorinë Meridiana.
“Ky është një moment i jashtëzakonshëm për të gjithë ne që kemi punuar me pasion dhe përkushtim për këtë projekt, dhe një vlerësim i jashtëzakonshëm për mundin e regjisorit, aktorëve, dhe të gjithë ekipit që kontribuan në realizimin e këtij filmi”, shkroi Matoshi në postimin e saj.
Aktorja theksoi se ky çmim është një dëshmi e fuqisë së artit dhe storytelling-ut, që arrin të prekë shpirtrat dhe zemrat e njerëzve, pa marrë parasysh kufijtë e gjuhës apo kulturës.
“Falenderojmë nga zemra të gjithë ata që na mbështetën gjatë këtij udhëtimi dhe që besuan tek puna jonë. Ky është vetëm fillimi, dhe me “Rexhon”, ne po i hapim një dritare të re për të treguar historitë tona, të vlerësuar dhe të ndarë me botën”, shtoi Matoshi.
Në fund të postimit të saj, Adriana Matoshi falënderoi Barin dhe të gjithë ata që ndihmuan për ta bërë këtë ëndërr realitet.
“Faleminderit Bari, faleminderit të gjithë atyre që kanë ndihmuar për ta bërë këtë ëndërr realitet!”, përfundoi aktorja dhe deputetja Matoshi.
“Të gjithë e thirrin Rexhon” ka arritur të rrëmbejë zemrat e publikut dhe të jurisë në Bari, duke dëshmuar fuqinë e kinematografisë kosovare në skenën ndërkombëtare.
