Pas katër vitesh në udhëheqje të qytetit, tashmë kur kanë mbetur edhe më pak se tre muaj për mbajtjen e zgjedhjeve lokale, Drejtoria për Inspektorat e Komunës së Fushë-Kosovës ka njoftuar se ka filluar aksionin për zbatimin e urdhëresës për lirimin e hapësirave publike.
Kjo nismë vjen në një kohë kur Fushë Kosova që udhëhiqet nga Burim Berisha i LDK-së, është shndërruar në një katrahurë të ndërtimeve pa asnjë kriter urbanistik, ku kaosi ndërtimor dhe mungesa e kontrollit institucional kanë dominuar hapësirën publike për vite me radhë, shkruan KosovaNews.
Në njoftim thuhet se pavarësisht njoftimeve paraprake, një pjesë e bizneseve nuk kanë liruar hapësirat publike, ndonëse janë informuar me kohë përmes procesverbaleve dhe vendimeve zyrtare.
“Aksioni ka filluar në rrugën “Hajrualla Zymi”, ndërsa në ditët në vijim do të vazhdojmë me rrugët e tjera të qytetit. Qëllimi i këtij aksioni është të rikthejë në funksion publik trotuaret, sheshet, rrugët dhe zonat e tjera të përbashkëta që janë të destinuara për përdorim të lirë nga qytetarët”, thuhet në njoftimin e tyre.
Po ashtu, bëhet e ditur se ky aksion do të përfshijë të gjithë territorin e qytetit të Fushë-Kosovës dhe do të zhvillohet me mbështetjen e institucioneve relevante, deri në përfundimin e tij të plotë.
Më herët, drejtori i Inspektoratit në këtë komunë, Donat Zharku tha deklaroi se aksioni do të vazhdojë edhe ditëve tjera.
“Po sot është duke ndodhur lirimi i hapësirave publike. Pavarësisht njoftimeve paraprake, një pjesë e bizneseve nuk kanë liruar hapësirat publike ndonëse janë informuar me kohë përmes procesverbaleve dhe vendimeve zyrtare. Qëllimi i këtij veprimi është kthimi i hapësirave publike për qytetarët dhe respektimi i rregullave komunale. Ky aksion do të përfshijë të gjithë territorin e qytetit të Fushë Kosovës dhe do të zhvillohet me mbështetjen e institucioneve relevante deri në përfundimin e tij të plotë”,
Ndërkaq më 15 maj, Komuna e Fushë Kosovës kishte lëshuar një urdhëresë për lirimin e sipërfaqeve publike nga objektet e përkohshme në territorin e kësaj komune.
