Aeroplani me kryeministrin sllovak, Robert Fico (partia Smer) është nisur për në Moskë përmes një rruge jugore, pasi Estonia, Letonia dhe Lituania nuk lejuan kalimin ajror të aeroplanit sllovak.
Gazeta Denník N publikoi itinerarin e fluturimit të Ficos – ai kalon përmes Hungarisë, Rumanisë, Detit të Zi, Gjeorgjisë dhe Federatës Ruse. Në Moskë pritet të aterojë në orën 20:26, sipas kohës lokale, ndërsa nisja nga Bratislava ishte planifikuar pas orës 15:00. Edhe pse fluturimi drejt kryeqytetit rus zakonisht zgjat rreth dy orë e gjysmë, Fico, për shkak të rrugës së devijuar, do të udhëtojë për më shumë se pesë orë.
Në aeroplan, përveç kryeministrit, ndodhen edhe dy eurodeputetë nga partia Smer, si dhe një deputet i parlamentit sllovak nga e njëjta parti, shkruan reuters.
Kryeministri i Sllovakisë njoftoi të mërkurën se për shkak të këtyre komplikimeve nuk do të mund të marrë pjesë në ngjarjet e planifikuara për të enjten në mbrëmje në Moskë. Fico, i cili do të marrë pjesë në shënimin e 80-vjetorit të mposhtjes së fashizmit, e cilësoi qëndrimin e vendeve baltike si një përpjekje të qëllimshme për të penguar vizitën e tij.
Të premten, Fico pritet të vendosë një kurorë lulesh te Varri i Ushtarit të Panjohur dhe të marrë pjesë në paradën ushtarake në Sheshin e Kuq – si i vetmi lider nga BE-ja që do të jetë i pranishëm. Janë parashikuar gjithashtu takime të tij me presidentët e Rusisë, Kinës, Brazilit dhe Vietnamit.
Opozita sllovake ka kritikuar ashpër vizitën e Ficos në Moskë. Shefja e diplomacisë evropiane, Kaja Kallas, gjithashtu paralajmëroi se një vizitë në një vend që sulmon ushtarakisht Ukrainën nuk do të kalojë pa pasoja.
Iniciativa qytetare “Paqe për Ukrainën” vendosi të mërkurën pranë aeroportit M. R. Stefanik në Bratislavë një mbishkrim të madh me tekstin “Lamtumirë Fico”. Iniciativa njoftoi të enjten se mbishkrimi i tyre ishte hequr gjatë natës.
