Federata e Futbollit e Kosovës e ka caktuar çmimin e biletave për ndeshjen finale të Kupës së Kosovës, ndërmjet SC Gjilani dhe FC Prishtina, e cila do të zhvillohet më 5 qershor, në stadiumin “Fadil Vokrri” në kryeqytet.
Si zakonisht çmimi më i ultë i biletave është për tribunat prapa portave: Në jug dhe veri hyrja kushton 3 euro, derisa në tribunën lindore bileta kushton 5 euro. Për tribunën kryesore – atë perëndimore bileta kushton 10 euro.
Për të dyja grupet e tifozëve, FFK-ja ka bërë të ditur se do t’i ndajë nga 200 bileta falas, derisa “Skifterat” do të jenë të vendosur në tribunën veriore, kurse “Plisat” në tribunën jugore.
Po ashtu, sot janë qartësuar edhe detajet e tjera sa i përket kësaj finaleje, ku në bazë të shortit, SC Gjilani në këtë takim do të jetë në cilësi të vendasit dhe do të luajë me fanella të kuqe, derisa FC Prishtina në cilësi të mysafirit do të luajë me fanella të bardha.
