I dërguari special i SHBA-së për Ballkanin Perëndimor, Gabriel Escobar, ka thënë se SHBA-ja e ka të qartë që nuk mund të ketë lëvizje të njëanshme nga ana e Kosovës dhe se lëvizjet e tilla do të kenë pasoja.
“Ne jemi të gatshëm të ndihmojmë në zgjidhjen e problemit, por Beogradi dhe Prishtina duhet të kthehen në dialog dhe të respektojnë marrëveshjet ekzistuese”, tha Escobar për Tanjug.
Sipas tij, shumë nga këto çështje mund të zgjidhen me themelimin e Asociacionit të Komunave me Shumicë Serbe.
I pyetur nëse adresa për ndihmë për serbët e Kosovës është në Bruksel apo në Washington, ai ka theksuar se SHBA-ja e mbështetë plotësisht dialogun nën udhëheqjen e BE-së dhe se po investojnë të gjitha përpjekjet për vazhdimin e tij. Ka shtuar se dialogu i vetmi kanal për zgjidhjen e çështjeve të të dyja palëve.
“Përkrahja jonë teknike, mbështetja jonë ekonomike dhe ndikimi ynë politik qëndron pas kësaj, sepse në fund të fundit, aspirata jonë më e madhe është që Kosova dhe Serbia të anëtarësohen në Bashkimin Evropian”, tha Escobar.
