Ministria e Ekonomisë, në bashkëpunim me Bashkimin Evropian, gjatë dy viteve të kaluara kishte subvencionuar qindra familje kosovare për blerjen e pajisjeve efiçiente për ngrohje, duke u mundësuar atyre konsum më të ulët të energjisë elektrike dhe ngrohje më efikase në dimër.
Ndërkaq për këtë vit, kjo ministri ende nuk ka dhënë një përgjigje të qartë nëse do të hapet thirrja për subvencionimin e pajisjeve efiçiente për ngrohje për shtëpi dhe banesa, siç kishte ndodhur gjatë dy viteve të fundit.
Në përgjigjen zyrtare për KosovaNews, kjo ministri ka bërë të ditur vetëm se më 16 shtator 2025 është prezantuar skema e re e granteve për energji të pastër, e cila mbështet ndërmarrjet prodhuese me fonde deri në 25 mijë euro për biznes.
Sipas njoftimit, skema financohet nga Qeveria e Luksemburgut dhe zbatohet nga KIESA/MINT në partneritet me Ministrinë e Ekonomisë dhe LuxDev. Përmes saj, bizneset mund të përfitojnë për investime në izolim të ndërtesave, sisteme solare fotovoltaike, sisteme solare termike, bateri për sistemet solare dhe pajisje për rritjen e efiçiencës.
Ndërsa për familjet, Ministria ka lënë ende të paqartë nëse do të ketë thirrje të re për subvencionimin e pajisjeve efiçiente ngrohjeje. Ajo ka sqaruar vetëm se qytetarët do të njoftohen me kohë në rast se hapet një thirrje e tillë, por për momentin nuk ka dhënë asnjë datë apo detaj konkret.
Kujtojmë se në vitin e kaluar, thirrja për këto lloj subvencionesh ishte hapur me 21 shtator. /KosovaNews /
