Zëvendësdrejtori i Policisë për rajonin e veriut, Veton Elshani ka thënë se municionet që u sekuestruan në Banjskë të Zveçanit janë gjetur afër vendit ku u vra rreshteri policor, Afrim Bunjaku më 24 shtator 2023.
“Në anën e djathtë të vendit ku u vra polici ynë në shtator, jo në drejtim të manastirit ku tashmë kemi bërë kontrolle, por para urës në këtë fshat – rastësisht kemi hasur në 689 copë municione”, ka thënë Veton Elshani, zëvendësdrejtor i Policisë për rajonin e veriut.
Siç njofton raporti i policisë, nuk ka të arrestuar, ndërsa rasti është nën hetime.
Ndryshe, në këtë fshat, më 24 shtator 2023, një grup terrorist nga Serbia i udhëhequr nga Milan Radojçiq, e kishte sulmuar Policinë e Kosovës, duke e lënë të vdekur rreshterin Afrim Bunjaku.
Pas këtij sulmi, ky grup kishte hyrë në Manastirin e Banjskës, ku kishin vazhduar luftimet me Policinë e Kosovës.
Si kundërpërgjigje, policia i kishte vrarë 3 pjesëtarë të grupit terrorist. Të tjerët kishin arritur të largoheshin.
Milan Radojçiq aktualisht gjendet i lirë në Serbi.
