Deputetja e Listës Guxo, Jeta Statovci ka mirëpritur lajmin për rregulloren e re të BQK-së, të cilën e bëri të ditur ministri i financave, Hekuran Murati e që thekson se nga sot (1 gusht 2023) bankat kanë për detyrë të ofrojnë llogari bazike falas ose me kosto minimale që nuk kalon 0.54 centë për muaj.
Për këtë foli edhe deputetja Statovci e cila shpjegoi fitimet e sektorit bankar ndër vite.
“Në dhjetor të vitit 2020, sektori bankar mbylli vitin me një fitim prej 80 milionë eurosh. Ndërsa, në vitin 2022, kjo shifër u rrit në 140 milionë euro ose një rritje prej 70%. Në të njëjtën kohë, hyrjet nga tarifat dhe komisionet në bankat komerciale kanë shënuar një rritje prej 65 milionë euro në dhjetor të vitit 2020 në 91.6 milionë euro në dhjetor të vitit 2022, ose një rritje prej rreth 41% vetëm në dy vitet e fundit”, tha ajo.
Statovci tutje u shpreh se kjo tregon një performancë pozitive të sistemit bankar në Kosovë, por thotë se fitimi i bankave ndodh shpesh mbi kurrizin e shumë qytetarëve të Kosovës.
“Problem ka qenë dhe qasja në banka për shumë qytetare të shtresave ekonomikisht me të uleta, duke krijuar pabarazi e cila aktualisht me lehtesi mund të cilesohet si nevojë bazike e një qytetari, për të marrë pagën, bursën, pënsionin, shtesat apo për transfere”, përfundoi ajo.
