Kryeministri i Kosovës, ka folur për herë të parë pas vendimit për shtrenjtim të rrymës për 15.4%.
Ai ka thënë shkurt, se Qeveria e Kosovës, do të vazhdojë t’i mbështesë qytetarët edhe pas këtij vendimi, me anë të subvencionimit për familjet të cilat konsumojnë energji elektrike deri në 800kw në orë.
Kurse familjet me asistencë sociale sipas kryeministrit Kurti, do të kenë trajtim të veçantë.
“Mbështetja jonë ndaj qytetarëve do të vazhdojë edhe pas vendimit të fundit të Zyrës së Rregullatorit për Energji ku ndër të tjera do të subvencionojmë familjet për konsum të energjisë deri në 800 kilovatë në muaj, kurse grupet e cenueshme siç janë familjet në asistencë sociale do të kenë trajtim të veçantë”, ka thënë Kurti.
Kryeministri tutje tha, se Qeveria deri më tani i ka investuar 9 milionë euro, për rinovimin e 70 ndërtesave publike, si shkollave, çerdheve publike e kështu me radhë.
“E me rreth 9 milionë euro kemi rinovuar e bërë efiçiente 70 ndërtesa publike. Shkolla, çerdhe të fëmijëve, qendra shëndetësore e stacione të zjarrfikëseve, duke e rritur kështu komforin e duke e ulur konsumin e energjisë. Gjatë dimrit që tashmë po e lëmë pas kemi parë rezultate të menjëhershme të këtyre masave të cilat i kemi ndërmarrë si qeveri, falë mbështetjes së bashkëpunimit me Bashkimin Evropian këto masa të dëshmuara po e shumëfishojnë e ashtu edhe përfitimet për qytetarët e për bizneset e vendit tonë”, tha ai.
Qeveria që drejtohet nga Albin Kurti që nga shtatori i vitit të kaluar ndarë miliona euro për të mbështetur qytetarët për shpenzimin e energjisë elektrike, duke ua lehtësuar kështu pagesat e faturave.
