Komuna e Prizrenit ka njoftuar se në kuadër të aktiviteteve për shënimin e Ditës Ndërkombëtare të Fëmijëve, është mbajtur edicioni i 21-të i Festivalit për Fëmijë “Fluturat”.
Në këtë organizim para publikut në Kejin përballë Xhamisë së Sinan Pashës kanë garuar 16 këngë të komponuara për fëmijët.
“Ky edicion, i mbështetur nga Drejtoria e Kulturës, Rinisë dhe Sportit, u realizua në mënyrën më profesionale dhe kreative, duke sjellë në skenë 16 këngë konkurruese, të gjitha kompozime origjinale”, thuhet në njoftimin e Komunës.
Fituesit e çmimeve speciale, sipas njoftimit kanë qenë: Dueti më i mirë – Këngë për FSK-në, kënduar nga Xheneta dhe Fitore Mallaki; Interpretimi më i mirë – Donika Ajdari (Gostivar); Debutantja më e mirë – Inara Bytyqi; Teksti më i mirë – Altida Berisha.
Ndërsa tre çmimet kryesore të festivalit, kanë qenë si në vijim: Vendi i tretë – Luna Salihu; Vendi i dytë – Glorisa-Tisi Paqarizi dhe Vendi i parë – Ada Bobaj.
“Çmimi kryesor i festivalit, “Flutura e Argjendtë”, shkoi për solisten nga Shqipëria – Kristel Krasniqi, një performancë që rrëmbeu zemrat e publikut dhe jurisë”, thuhet në njoftimin e Komunës së Prizrenit, raporton Telegrafi.
Ky festival, sipas njoftimit, jo vetëm që promovon talentin e fëmijëve, por edhe nxit krijimtarinë muzikore dhe bashkëpunimin kulturor mes trevave shqiptare.
