Presidenti i Shteteve të Bashkuara të Amerikës, Donald Trump, ka dhënë një paralajmërim të fortë lidhur me përpjekjet për paqe mes Rusisë dhe Ukrainës.
Në një konferencë për media në Shtëpinë e Bardhë, Trump tha:
“Nëse në ditët e ardhshme nuk shpallet një takim mes Presidentit Putin dhe Presidentit Zelenski, do ta shihni se çfarë do të ndodhë. Po e ndjek nga afër këtë situatë. Nëse nuk ka rezultat, do të ndërmarrim një qasje tjetër.”, përcjell KosovaNews.
Trump tregoi se ka biseduar me Vladimir Putinin disa javë më parë, duke e cilësuar takimin si “shumë të mirë”, ndërsa nuk dha detaje rreth “hapave të ardhshëm” nëse bisedimet nuk japin rezultat.
“Lufta duhet të përfundojë”
Presidenti amerikan theksoi se lufta në Ukrainë është e papranueshme:
“Vetëm javën e kaluar humbën jetën 7 mijë e 313 ushtarë rusë dhe ukrainas. Nuk ka asnjë arsye për këtë. Dua që kjo të marrë fund.”
Lexo po ashtu:
Trump foli edhe për zërat mbi shëndetin e tij, pasi kishte kohë që nuk kishte mbajtur konferenca për media. Ai i quajti këto pretendime “lajme të rreme”:
“Dy ditë nuk dola para mediave dhe menjëherë thanë ‘diçka nuk është në rregull’. Ndërkohë, Biden s’u paraqit për muaj të tërë dhe askush nuk foli.”
Mesazhe për Kinën dhe situatën e brendshme:
I pyetur nëse parada ushtarake në Kinë, ku pritet të marrin pjesë Putin dhe Kim Jong Un, është një sfidë ndaj SHBA-së, Trump u përgjigj:
“Aspak. Kina ka nevojë për ne më shumë se sa ne për ta. Kam marrëdhënie shumë të mira me Presidentin Xi.”
Ai shtoi se është gati të ndërhyjë në qytetet amerikane për sigurinë e vendit:
“Kam detyrimin ta mbroj këtë vend, edhe nëse ka kundërshtime lokale.”
